धायरी : धायरी गावातील स्मशानभूमीमधे स्वच्छता, पाणीपुरवठा अशा मुलभूत सुविधांची वानवा असल्याने महानगर पालिकेच्या अधिकाऱ्यांचे लक्ष वेधून घेण्यासाठी बंधुत्व ग्रुप, मिलिंद पोकळे व त्यांचे सर्व सहकारी यांनी स्मशानभूमीत लाक्षणिक उपोषण केले.

सोमवारी गावातील सावडण्याचे, अस्थी जमा करण्याचे २ विधी होते. साधारण ४००-५०० नागरिक जमा झाले होते. मात्र नळाला पाणी नसल्याने नागरिकांची गैरसोय झाली.‌ स्वच्छताग्रुहातून पाणी घेऊन वापर करण्याची वेळ आली.

मिलिंद पोकळे यांनी वाॅर्ड ऑफीसचे संदीप खलाटे यांच्याशी संपर्क साधून प्रश्न सांगितला. त्यानंतर तेथे एक कर्मचारी पोहचला. पोकळे यांनी सांगितले की महानगरपालिकेच्या मदमस्त अधिकाऱ्यांना गैरसोयींची थोडी सुध्दा जाणीव नाही. अशा अधिकाऱ्यांचा व महानगरपालिकेचा जाहीर  निषेध आम्ही करतो. जो पर्यंत या अधिकाऱ्यांना जाग येत नाही तो पर्यंत आंदोलन केले जाईल.