पुणे : आगामी लोकसभा निवडणुकीत बारामती मतदारसंघातून भाजपचाच उमेदवार जिंकणार असा विश्वास मुख्यमंत्री देवेंद्र फडणवीस यांनी व्यक्त केला. 

शक्ती केंद्र संमेलन आणि पक्ष कार्यकर्त्यांना मार्गदर्शन करण्यासाठी भाजपचे अध्यक्ष अमित शहा आज (शनिवार) पुणे दौऱ्यावर आहेत. त्यानिमित्त आयोजित कार्यक्रमात बोलताना मुख्यमंत्र्यांनी युतीबाबत आणि पुणे, बारामती आणि शिरूर या मतदारसंघांबाबत व्यक्तव्ये केली. 

मुख्यमंत्री म्हणाले, की आगामी निवडणुकीत ४८ जागा लढवण्याची आमची तयारी आहे. बारामती लोकसभा आता जिंकणारच आहोत. या निवडणुकीत कमळाच्या चिन्हावर लढणार आहोत. मागील निवडणुकीत चूक झाली त्यामुळे हरलो, पण आता तसे होणार नाही. महाराष्ट्रात आम्ही जिंकलेल्या 42 जागांच्या आता 43 जागा होतील आणि ती 43 वी जागा बारामतीची असेल. बारामतीत भाजपचे कमल फुलवू. पुढील निवडणूक सत्तेसाठी नव्हे तर भारताच्या आयुष्य आणि भविष्यासाठी महत्त्वाची असेल. त्यामुळे ती पुन्हा जिंकायची आहे.