तुम्ही सर्वांनी अनेकदा कुत्र्यांच्या निष्ठेचे किस्से ऐकले असतील अथवा चित्रपटात पाहिलेही असतील. कुत्र्याच्या इमानाची अशीच एक घटना समोर आली आहे. पुण्यातील वडगाव शेरीमध्ये कुत्रा चक्क कोब्रासोबत लढला. नुसता लढलाच नाही, तर स्वत:च्या प्राणाची बाजी लावत कोब्राला संपवलं. कोब्राने कुत्र्याच्या पायाचा दोन वेळा चावा घेतला. वेदनेत असतानाही कुत्र्याने लढायचं सोडलं नाही, अखेर कोब्राला संपवलेच.

वडगाव शेरीमधील ब्रम्हा सनसीटीच्या ग्रार्डनसमोर कुत्रा आणि कोब्रा यांच्यातील संघर्ष झाला. कुत्र्याने जिवाची बाजी लावत अनेकांचे प्राण वाचवले. या गार्डनमध्ये लहानग्यांपासून वृद्धापर्यंत फेरफटका मारण्यासाठी येतात. सकाळच्या वेळी कोब्राला पाहिल्यानंतर सापाने त्याच्यावर हल्ला चढवला. कुत्रा बेशुद्धअवस्थेत पडला होता. त्याचवेळी तिथं उपस्थित असणाऱ्या नागरिकाने सर्पमित्र आणि प्राणीमित्रांना याविषयीची माहिती दिली. कुत्र्याला उपचारासाठी रुग्णालयात दाखल करण्यात आलं. मात्र, उपचार सुरु असताना त्याने प्राण सोडले.

जिवाची बाजी लावत कोब्रासारख्या विषारी सापाविरोधात लढा देत कुत्र्याने प्राण सोडले. कुत्रा खरंच खूप धैर्यवान होता, अशी प्रतिक्रिया प्राणीमित्रांनी दिली. गार्डन आणि परिसरातून फिरणाऱ्या अनेकांचे प्राण कुत्र्याने वाचवले. येथील नागरिकांनीही कुत्र्याला भावूक आंतकरणाने अखेरचा निरोप दिला. यावेळी प्रत्येकाच्या डोळ्यात अश्रू तरळत होते. कुत्रा हा प्रामाणिक प्राणी असल्याचे अनेक किस्से ऐकतच असतो. पण, त्याला दुजोरा देणारी एक घटना वडवाग शेरी येथे घडल्याची प्रतिक्रिया सोशल मिडियावर उमटत आहे.