बारामती : शहरातील नगरपालिकेसमोरील शारदा प्रांगणातील शाळेमध्ये आजपासून (ता. 5) कोविड प्रतिबंधक लसीकरण सुरु झाल्याने बारामतीकरांना मोठा दिलासा मिळाला आहे. सिल्व्हर ज्युबिली रुग्णालय, आरोग्य विभाग व बारामती नगरपालिकेच्या संयुक्त विद्यमाने लसीकरण केंद्र सुरु करण्यात आले आहे. 

हेही वाचा - कोरोना रोखण्याच्या उपाययोजनांना राज्यातील जिम चालकांचा एकमुखाने पाठिंबा

एमआयडीसीतील शासकीय महिला रुग्णालयात लसीकरणासाठी लोकांना जावे लागत होते. हे रुग्णालय शहरापासून दूर अंतरावर असल्याने अनेक जण लसीकरणासाठी जाण्यास टाळाटाळ करत होते, ही बाब लक्षात घेत शहरातील शारदा प्रांगणात लसीकरण सुरु व्हावे या साठी ज्येष्ठ नगरसेवक किरण गुजर यांनी पुढाकार घेतला होता.

स्वताः उपमुख्यमंत्री अजित पवार यांनीही आरोग्य विभागास या बाबत कार्यवाही करण्याच्या सूचना दिल्या होत्या. त्या नुसार आजपासून हे लसीकरण सुरु झाले. शारदा प्रांगण बारामती शहराला मध्यवर्ती असल्याने अनेक लोक येथे येऊन लसीकरण करताना पहिल्याच दिवशी दिसले. या ठिकाणी सर्व यंत्रणा उपलब्ध असून लसीकरणानंतर काही काळ नागरिकांना निरिक्षणाखाली ठेवले जात होते, या शिवाय त्यांना गोळ्याही दिल्या जात आहेत. 

या ठिकाणी ऑनलाईन पध्दतीने नोंदणीची सुविधा देण्यात आली असून डॉक्टर, परिचारिका व इतर सहकारी लसीकरण वेगाने करण्याचा प्रयत्न सुरु आहे. 

हेही वाचा - पुण्यात मास्कची शिस्त मोडणाऱ्या नागरिकांकडून तब्बल २८ कोटींचा दंड वसूल

उपविभागीय अधिकारी दादासाहेब कांबळे, वैद्यकीय अधिकारी डॉ. सदानंद काळे, तालुका आरोग्य अधिकारी डॉ. मनोज खोमणे यांनी या लसीकरण केंद्रास भेट दिली. उपनगराध्यक्ष अभिजीत जाधव, किरण गुजर, सुधीर पानसरे, अभिजीत चव्हाण आदींनी व्यवस्थापनाची जबाबदारी सांभाळली. 

फोटो- बारामती- येथे शारदा प्रांगणात सोमवारपासून लसीकरण केंद्र सुरु झाले. लसीकरणाची पाहणी करताना उपविभागीय अधिकारी दादासाहेब कांबळे, वैद्यकीय अधीक्षक डॉ. सदानंद काळे व नगरसेवक किरण गुजर.