पुणे - शिक्षक पात्रता परीक्षा (टीईटी) (TET Exam) गैरव्यवहारात अटकेत असलेले आरोपी राज्य परीक्षा परिषदेचे आयुक्त तुकाराम सुपे (Tukaram Supe) यांना कोरोनाची (Corona) लागण झाली आहे. सुपे यांना उपचारांसाठी खासगी रूग्णालयात दाखल करण्यात यावे असा अर्ज सुपे यांच्या वकिलांकडून शुक्रवारी न्यायालयात सादर करण्यात आला.

सुपे कोरोनाबाधित असल्याचे चाचणीत निष्पन्न झाले असून त्यांना खासगी रूग्णालयात दाखल करण्यात यावे. उपचाराचा खर्च सुपे करण्यास तयार आहेत, असा अर्ज सुपे यांचे वकील ॲड. मिलिंद पवार, ॲड. योगेश पवार, ॲड. विश्वास खराबे यांनी न्यायालयात सादर केला. प्रथम वर्ग न्यायदंडाधिकारी एस. जे. डोलारे यांनी अर्ज दाखल करून घेतला आहे. या अर्जावर सरकार पक्ष तसेच तपास अधिकाऱ्यांनी त्यांचे म्हणणे मांडावे, असे न्यायालयाने आदेशात नमूद केले. या अर्जावर सोमवारी (१० जानेवारी) सुनावणी होणार आहे.

या प्रकरणी पोलिसांनी नाशिक येथून आरोग्य विभागातील एक टेक्निशियन आणि चाळीसगाव येथून जिल्हा परिषदेच्या शाळेतील एका शिक्षकाला अटक केली आहे. दोघांनी मिळून ३५० परीक्षार्थींकडून तीन कोटी ८५ लाख रुपये घेऊन ते एजंटमार्फेत मुख्य आरोपींना दिल्याची बाब तपासात समोर आला आहे. सुरंजित गुलाब पाटील (वय ५०, रा. नाशिक) आणि स्वप्नील तीरसिंग पाटील (रा. जळगाव) अशी अटक करण्यात आलेल्यांची नावे आहेत.