उंड्री - पाणी, रस्ते, वीज, ड्रेनेज, अशा सुविधा मिळण्यासाठी आम्ही कर भरतो. मात्र, ससाणेनगर लेन क्र.12 मध्ये मागिल तीन महिन्यांपासून ठेकेदाराने काम केल्यानंतर राडारोडा उचलला नाही, त्यासाठी हडपसर क्षेत्रीय कार्यालय आणि लोकप्रतिनिधींकडे वारंवार तक्रार करूनही दखल घेतली गेली नाही. ठेकेदाराच्या बेफिकीरीपणाचा त्रास सामान्य नागरिकांना सहन करावा लागत आहे. ठेकेदार बेफीकीरपणे काम करत असेल तर त्याच्यावर कारवाई करण्याची जबाबदारी लोकप्रनिधी आणि प्रशासनाची आहे की, सामान्य नागरिकांची आहे, असे संतप्त सवाल नागरिकांनी उपस्थित केला आहे.

ससाणेनगर लेन क्र. 12 मध्ये सांडपाण्याची वाहिनी बदलून नवीन वाहिनी टाकण्यासाठी रस्ता खोदला. नवीन वाहणी टाकल्यानंतर रस्ता दुरुस्तीचे काम संबंधित ठेकेदाराचे असून, ते केले की नाही, त्याची शहानिशा करण्याचे काम पालिका अधिकाऱ्यांचे आहे. मात्र, पालिका अधिकाऱ्यांच्या अक्षम्य दुर्लक्षामुळे ठेकेदार मोकाट झाले आहेत. या ठिकाणी पडलेल्या राडारोडा ज्येष्ठ नागरिक आणि लहान मुलांना अपघाताचा धोका वाढला आहे. लोकप्रतिनिधी आता तरी लक्ष देतील का, अशी विचारणा स्थानिकांनी केली आहे.