पुणे : कोरोनाच्या रुग्णांवर उपचारांसाठी प्रभावी ठरणाऱ्या रेमडेसिव्हिर इंजेक्शनचा पुण्यात तुटवडा निर्माण झाला आहे. यामुळे या इंजेक्शनचा काळा बाजार सुरु असल्याचंही समोर आलं आहे. याप्रकरणी पुणे पोलिसांनी एकाला ताब्यातही घेतलं आहे. दरम्यान, रेमडेसिव्हिरसाठी शहरात औषध दुकानांबाहेर रांगा लागल्याचं चित्र पहायला मिळत आहे. यावरुन सुरु असलेला गोंधळ थांबवण्याासाठी जिल्हा प्रशासनानं एक महत्वाचं पाऊल उचललं असून विशेष 'कन्ट्रोल रुम'ची स्थापना करण्यात येणार आहे.

पुण्यात रेमडेसिव्हिर इंजेक्शनच्या पुरवठ्याचं योग्य नियोजन व्हावं यासाठी जिल्हाधिकारी राजेश देशमुख यांनी 'कोन्ट्रोल रुम' स्थापन करण्याचे आदेश काढले आहेत. या आदेशानुसार, ज्या रुग्णांना रेमडेसिव्हिर या इंजेक्शनची गरज असेल त्यांना ०२०-२६१२३३७१ किंवा १०७७ या टोल फ्री क्रमांकावर संपर्क साधता येणार आहे. रेमडिसिव्हिर संदर्भात स्थापन करण्यात आलेली ही कन्ट्रोल रुम ३१ मे पर्यंत कार्यरत असणार आहे.