पुणे -  विद्येचे माहेरघर असलेल्या पुणे शहरातील शैक्षणिक क्षेत्रालाही कोरोनामुळे ग्रहण लागले आहे. परराज्ये, अन्य जिल्ह्यांतून पुण्यात शिक्षणासाठी येणाऱ्या विद्यार्थ्यांची संख्या 30 टक्‍क्‍यांनी कमी होणार असल्याने शिक्षण संस्थांचे आर्थिक गणितही बिघडणार आहे. पुणे आणि मुंबईत कोरोनाचा संसर्ग वेगाने वाढत असल्याने या शहरांतील शिक्षण व्यवस्थेला त्याचा प्रचंड फटका बसणार आहे. त्याचा दुष्परिणाम पुढील एक-दोन वर्ष होत राहील. त्यातून मार्ग कसा काढायचा, अशी चिंता शिक्षण संस्थाचालकांना लागली आहे. 

पुणे शहरात सर्व विद्यापीठे आणि महाविद्यालये मिळून पाच लाख विद्यार्थी शिक्षण घेतात. एकूण विद्यार्थी संख्येच्या सुमारे 30 टक्के विद्यार्थी हे परदेश, दिल्ली इतर राज्ये तसेच राज्यातील अन्य जिल्ह्यांमधून अभियांत्रिकी, वैद्यकीय, पदवी, एमबीएसह पदव्युत्तर पदवी आदी अभ्यासक्रमांसाठी पुण्यात येतात. या शहरातील कोरोनाची स्थिती पाहिली तर बाहेरून येणारे हे विद्यार्थी पुण्यात येणार नाहीत, असा अंदाज संस्थाचालक व्यक्त करतात. 

ताज्या बातम्यांसाठी डाऊनलोड करा ई-सकाळचे ऍप   

विद्यार्थीसंख्या एकदम घटल्याने शुल्कातून मिळणाऱ्या रकमेतही मोठी घट होणार आहे. तसेच विद्यार्थ्यांना शुल्क भरण्यास सवलतही द्यावी लागणार आहे. त्या तुलनेत खर्च मात्र सुरूच राहणार असल्याने शिक्षण संस्थाचे गणितही कोलमडणार आहे. कोरोनापश्‍चात शिक्षण क्षेत्रावर होणाऱ्या परिणामांचा विचार करायला संस्थांनी सुरवात केली आहे. वेतन वगळता विस्तार आणि अन्य खर्चात कपात करण्याचे नियोजन सुरू झाले आहे. सरकारकडेही काही सवलती देण्यासंबंधी मागणी होऊ लागली आहे. याबरोबर ऑनलाइन शिक्षणाच्या माध्यमातून विद्यार्थ्यांना संस्थेशी जोडून ठेवण्याचा प्रयत्न देखील केला जात आहे. 

डेक्कन एज्युकेशन सोसायटीचे अध्यक्ष डॉ. शरद कुंटे यांनी सांगितले, की संस्थेने पाचवी ते पदव्युत्तर पदवी अभ्यासक्रमाचे शिक्षण ऑनलाइन पद्धतीने देण्याची व्यवस्था केली आहे. ज्यांच्याकडे मोबाइल वा लॅपटॉप नाहीत, त्यांना या सुविधा तात्पुरत्या स्वरुपात देण्याचे नियोजन आहे. केवळ विद्यार्थ्यांनी प्रवेश घ्यावा. फक्त प्रात्यक्षिक आणि अंतर्गत परीक्षांना शाळा-महाविद्यालयात यावे. अन्य अभ्यासक्रम ऑनलाइन शिकवला जाईल, असे नियोजन केले आहे. सरकारने वीज बिल, जीएसटी यात काही सवलत द्यावी, अशी मागणी केली आहे. 

पुण्याच्या बातम्या वाचण्यासाठी येथे ► क्लिक करा 
 
पुण्यात शिक्षणासाठी येणाऱ्या विद्यार्थ्यांच्या संख्येत कोरोनामुळे मोठी घट होईल. विद्यार्थी त्यांच्या गावीच शिक्षण घेतील. यामुळे शहरातील शिक्षण संस्थांपुढे आर्थिक अडचणी निर्माण होणार आहेत. संस्था काही खर्चकपात करतील. पण सरकारनेही शैक्षणिक सेवांवर आकारला जाणारा जीएसटी माफ केला पाहिजे. 
- डॉ. विद्या येरवडेकर, प्रधान संचालिका, सिंबायोसिस 
 

स्वयंअर्थसहाय्यित, विनाअनुदानित संस्था आणि विद्यापीठांना विद्यार्थीसंख्या घटल्याचा फटका बसू शकेल. ग्रामीण भागातील आर्थिक उत्पन्नावर परिणाम झाल्याने विद्यार्थी एक-दोन वर्षे तरी स्थानिक स्तरावर शिक्षण घेण्यास प्राधान्य देतील. 
- डॉ. एन. एस. उमराणी, उपकुलगुरू, सावित्रीबाई फुले पुणे विद्यापीठ 
 

पिंपरी चिंचवडच्या बातम्या वाचण्यासाठी येथे ► क्लिक करा

 
विद्येच्या माहेरघरात 
विद्यापीठे : 15 
महाविद्यालये : 225 
विद्यार्थी संख्या 5 लाख 

बदलते चित्र 
-कोरानाचा शिक्षणसंस्थांना फटका 
-खर्च कमी करण्याचे धोरण 
-ऑनलाइन शिक्षणाला प्राधान्य 
-सरकारकडे सवलतींची मागणी