पुणे : पुणे शहरातील (Pune City) दिवसातील नवीन कोरोना रुग्णांचा (Corona Patient) आकडा गुरुवारी (ता.३०) तीनशेच्या घरात पोचला आहे. गुरुवारी दिवसांत शहरात २९८ नवे कोरोना रुग्ण आढळून आले आहेत. शहरातील दिवसातील नवीन कोरोना रुग्णांचा आकडा १०५ दिवसांच्या (साडेतीन महिने) खंडानंतर गुरुवारी पहिल्यांदाच तीनशेच्या जवळ गेला आहे. जिल्ह्यात दिवसभरात ४७७ नवे कोरोना सापडले आहेत.

याआधी १६ सप्टेंबर २०२१ ला पुणे शहरात दिवसात २१५ नवे कोरोना रुग्ण आढळून आले होते. तेव्हापासून दिवसातील हा आकडा सातत्याने कमी कमी होत गेला होता. त्यानंतर तब्बल साडेतीन महिन्याच्या खंडानंतर २९ डिसेंबर २०२१ ला एका दिवसात २३२ नवे कोरोना रुग्ण आढळले होते. मंगळवारच्या (ता.२८) तुलनेत (बुधवारी) ६१ रुग्णांची वाढ झाली होती. त्यानंतर आता बुधवारच्या (ता.२९) तुलनेत गुरुवारी (ता.३०) पुन्हा ६६ रुग्णांनी वाढ झाली आहे. जिल्हा परिषदेच्या आरोग्य विभागाच्यावतीने शहर व जिल्ह्यातील कोरोना रुग्ण स्थितीचा अहवाल रोज रात्री प्रसिद्ध करण्यात येतो. या अहवालातून ही बाब स्पष्ट झाली आहे.

गुरुवारी दिवसभरात पुणे जिल्ह्यात आढळून आलेल्या एकूण नवीन रुग्णांत पुणे शहरातील २९८ रुग्णांबरोबरच पिंपरी चिंचवडमध्ये ८०, जिल्हा परिषद कार्यक्षेत्रात ६९, नगरपालिका हद्दीत १० आणि कॅंटोन्मेंट बोर्ड क्षेत्रात २० नवे रुग्ण आढळून आले आहेत. दरम्यान, जिल्ह्यात दिवसात १३४ जण कोरोनामुक्त झाले आहेत. अन्य तीन रुग्णांचा कोरोनाने मृत्यू झाला आहे.

दिवसभरात कोरोनामुक्त झालेल्यांमध्ये पुणे शहरातील ३३, पिंपरी चिंचवडमधील ६७, जिल्हा परिषद कार्यक्षेत्रातील १९, नगरपालिका हद्दीतील ६ आणि कॅंटोन्मेंट बोर्ड क्षेत्रातील नऊ जण आहेत.