दौंड (पुणे) : मुंबई येथील कोरोना संक्रमण झालेल्या "रेड झोन'मध्ये बंदोबस्त करून दौंड तालुक्‍यात परतलेल्या राज्य राखीव पोलिस दल (एसआरपीएफ) गट क्रमांक सातच्या 14 पोलिसांनी कोरोनावर मात केली आहे. त्यामुळे दौंड तालुक्‍यातील कोरोनाबाधितांची एकूण संख्या 9 झाली आहे. 

"आम्हाला काय कोरोना झालाय का? तुम्हाला कोणी सांगितले?' 

याबाबत एसआरपीफ गट क्रमांक सातच्या वैद्यकीय अधिकारी डॉ. वैशाली खान यांनी आज (ता. 18) माहिती दिली की, मुंबईमधील शिवाजीनगर येथे बंदोबस्ताकरिता तैनात पोलिस अधिकारी व कर्मचारी यांचा समावेश असलेली तुकडी परतल्यानंतर त्यांना दौंड शहरात न आणता नानवीज (ता. दौंड) येथील राज्य राखीव पोलिस प्रशिक्षण केंद्रातील विलगीकरण कक्षात ठेवण्यात आले आहे. त्यातील 94 पैकी 25 ते 41 वयोगटातील एकूण 15 पोलिसांना 8 मे रोजी कोरोनाची बाधा झाली होती. त्यापैकी 14 जणांचे वैद्यकीय अहवाल आज प्राप्त झाले असून, ते सर्व निगेटिव्ह आहेत. एक अहवाल प्रलंबित आहे. निगेटिव्ह अहवाल आलेल्या पोलिसांना होम क्वारंटाइन केले जाणार आहे. 

भोरच्या व्यापाऱ्यांनी मोडला आदेश, तरीही प्रशासन खूष

दौंड तालुक्‍यात 29 एप्रिल रोजी 70 वर्षीय नागरिकास पहिल्यांदा कोरोनाची बाधा झाली होती. आजअखेर एकूण 32 कोरोना रुग्ण सापडले असून, त्यापैकी उपचारानंतर 23 जण बरे झाले आहेत. एसआरपीएफ गट क्रमांक सातचे 22 पोलिस आणि दहिटणे (ता. दौंड) येथील 70 वर्षीय नागरिक बरे झाले आहेत. गट क्रमांक सातचे 5 पोलिस, इंडियन रिझर्व्ह बटालियनचे (आयआरबी) 3 पोलिस आणि एक वयस्कर दूध विक्रेते, असे एकूण 9 बाधित रुग्ण असून, त्यांच्यावर पुणे येथे उपचार सुरू आहेत. 

पुण्याच्या इतर बातम्या वाचण्यासाठी येथे क्लिक करा  

मुंबई येथून बंदोबस्त करून परतलेले एसआरपीएफ गट क्रमांक पाच व सात आणि आयआरबीच्या पोलिसांना खबरदारीचा उपाय म्हणून दौंड तालुक्‍यातील विविध विलगीकरण कक्षांमध्ये ठेवण्यात आले आहे.