पुणे Coronavirus : रुग्णांना डॉक्टरांच्या क्लिनिकपर्यंत पोचविण्यासाठी रिक्षा पंचायतीने पुढाकार घेतला आहे. त्यासाठी इंडियन मेडिकल असोसिशन आणि रिक्षा पंचायत यांनी एकत्र येऊन हा रुग्णसेवेसाठी आपत्कालीन रिक्षा सेवा उपक्रम सुरू केला आहे. येत्या रविवारीपासून (ता. 26) हे सेवा शहरात सुरू होणार आहे.

आणखी वाचा - पुण्यात अडकलेल्या विद्यार्थ्यांसाठी महत्त्वाची बातमी

कोरोनाच्या उद्रेकामुळे लॉकडाऊन सुरू आहे. त्यामुळे कोणत्याही कारणासाठी घराबाहेर पडणे अवघड असते. त्यात रुग्णाला डॉक्टरांच्या दवाखान्यापर्यंत किंवा त्यांच्या रुग्णालयापर्यंत जायचे तर, वाहनाची व्यवस्था होत नाही. बस, रिक्षा बंद असल्याने डॉक्टरांपर्यंत जाणार कसे, हा मोठा प्रश्न निर्माण झाला आहे. त्यातून मार्ग काढण्यासाठी पुण्यातील रिक्षा पंचायत आणि इंडियन मेडिकल असोसिएशन एकत्र आल्या आहेत. यात पोलिसांनी सहकार्य केले आहे.  या बद्दल अधिक माहिती देताना इंडियन मेडिकल असोसिएशनच्या राज्य शाखेचे अध्यक्ष डॉ. अविनाश भोंडवे म्हणाले, “रुग्णसेवा करत असतानाच रिक्षा चालकाचे आरोग्य चांगले आणि सुरक्षित राहिले पाहिजे, यात या उपक्रमात प्राधान्य दिले आहे. त्यासाठी मार्गदर्शन सुचना देण्यात आल्या आहेत. त्यासाठी त्यांचे प्रशिक्षणसुद्धा घेण्यात येईल.” सध्या 9859198591 या मोबाईल क्रमांकावर ही सुविधा सुरू करण्यात आल्याची माहिती देण्यात आली आहे.

आणखी वाचा - लॉकडाऊनमध्ये घरबसल्या डॉक्टरांचा सल्ला; ऑनलाईन ओपीडी सुरू

दरम्यान, हा उपक्रम लवकरच शहरातील वेगवेगळ्या भागात राबविला जाणार आहे. त्यात सुमारे दोनशे रिक्षांचा समावेश असेल. शहरातील प्रत्येक भागातील रिक्षा चालकांना मोबाईल क्रमांक दिला जाईल. त्या भागातील रुग्णांना फोन करून पत्ता सांगितल्यानंतर ती रिक्षा रुग्णांना डॉक्टरांकडे घेऊन जाण्यासाठी येईल, अशी ही व्यवस्था उभारण्यात आली आहे, असेही त्यांनी स्पष्ट केले. रिक्षा पंचायतचे नितीन पवार म्हणाले, “आपत्कालीन रिक्षा सेवेचा उद्देश हा शहरातील रुग्णांना वाहतूकीची सेवा उपलब्ध करून देणे हा आहे. त्यासाठी रिक्षा निर्जंतूककरण्याच्या पद्धतीचे प्रशिक्षण त्यांना देण्यात येणार आहे. येत्या रविवारपासून हे प्रशिक्षण सुरू होणार असून, पहिल्या टप्प्यात दोनशे रिक्षा चालकांना प्रशिक्षण देण्यात येईल. त्यात शहरातील वेगवेगळ्या भागातील रिक्षा चालकांचा समावेश असेल.” 

आणखी वाचा - लॉकडाऊन निवारा केंद्रात फुलली प्रेमकहाणी
 
रिक्षा चालकांनो हे करा

• रोज सकाळी रिक्षा बाहेरुन स्वच्छ पाण्याने धुवा
• रिक्षेचा आतील भाग सॅनिटाजर स्प्रे मारून स्वच्छ कपड्याने पुसा
• एक प्रवाशीचे भाडे पूर्ण झाल्यानंतर रिक्षा पुन्हा आतून निर्जंतूक करा
• प्रत्येक वेळी तुमचे हात साबणाने स्वच्छ धुवून घ्या
• हात स्वच्छ सॅनिटायजरचा वापर करा
• रिक्षाचे मिटर, हँडल, पुढचे सिटस् यावरची सॅनिटायजरचा स्प्रे मारून पुसा
• रिक्षा चालकाने कापडी मास्क लावावा
• नाक आणि तोंड पूर्ण झालेले जाईल असा मास्क बांधावा
• रोज स्वच्छ धुतलेला मास्क वापरावा