पुणे : गृहनिर्माण सोसायट्यांमध्ये पुन्हा कोरोनाबाधित रुग्णांचे प्रमाण वाढत चालले आहे. या पार्श्वभूमीवर काही प्रमाणात थंडावलेल्या गृहनिर्माण सोसायट्या पुन्हा अलर्ट मोडवर आहेत. सोसायट्यांमधील सभासदांकडूनच खबरदारी घेण्याची मागणी होत असल्यामुळे पदाधिकाऱ्यांनीही उपाययोजना सुरू केल्या आहेत. सोसायटीत बाहेरून येणाऱ्या नागरिकांना मास्क आणि सॅनिटायझरचा वापर अनिवार्य केला आहे.
गेल्यावर्षी मार्च महिन्यात कोरोनाचा संसर्ग सुरू झाल्यानंतर गृहनिर्माण सोसायट्यांनी प्रशासनाच्या निर्देशानुसार उपाययोजना सुरू केल्या होत्या. त्यात बाहेरून येणाऱ्या नागरिकांना मास्क आणि सॅनिटायझरचा वापर अनिवार्य होता. सोसायट्यांमधील जिम, स्वीमिंग पूल, क्लब हाउस आणि उद्यान बंद ठेवले होते. कोरोनाचा संसर्ग कमी झाल्यानंतर स्वीमिंग पूल वगळता सर्व काही पूर्ववत झाले. परंतु पुन्हा कोरोनाचा संसर्ग झपाट्याने वाढू लागल्यामुळे प्रशासनाने कठोर निर्बंध लागू केले आहेत. सोसायट्यांमधील क्लब हाउस ३१ मार्चपर्यंत बंद राहतील. जिम आणि उद्यानात नियमांचे पालन करावे लागेल.
जिल्हा उपनिबंधक (सहकार) कार्यालयाने दिलेल्या माहितीनुसार, जिल्हा आणि महापालिका प्रशासनाने जारी केलेल्या मार्गदर्शक सूचनांचे पालन करणे गृहनिर्माण सोसायट्यांना बंधनकारक आहे. त्याचे उल्लंघन झाल्यास आपत्ती व्यवस्थापन कायदा २००५ आणि भारतीय दंड संहितेचे कलम १८८ नुसार कायदेशीर कारवाई करणार आहे.

सोसायट्यांनी कोणती खबरदारी घ्यावी :

१) सोसायटीचा परिसर आणि लॉबीमध्ये फवारणी करून निर्जंतुकीकरण करणे.
२) प्रवेशद्वारावर नागरिकांना विनामास्क प्रवेश देवू नये.
३) थर्मल गन आणि पल्स ऑक्सीमीटरद्वारे तपासणी करावी.
४) हॅंड सॅनिटायझर उपलब्ध करून देणे.
५) रहिवाशांनी मास्कचा वापर आणि शारीरिक अंतर राखण्याचे काटेकोर पालन करणे.
६) बाधित रुग्णांच्या नातेवाइकांनी शक्यतो घराबाहेर पडू नये, अथवा मास्क परिधान करून बाहेर पडावे
७) १४ दिवस गृह विलगीकरणात असताना क्षेत्रीय कार्यालय किंवा ग्रामपंचायत कार्यालयात माहिती देणे.

गृहनिर्माण सोसायट्यांनी राज्य सरकार आणि स्थानिक प्रशासनाने लागू केलेल्या नियमांचे पालन करावे. वृध्द नागरिकांना आणि लहान मुलांना सोसायटीच्या बाहेर जावे लागू नये, यासाठी सभासदांनी मदत करावी. सोसायटीतील कामकाजासाठी स्वयंसेवक तयार करावेत.
- सुहास पटवर्धन,
अध्यक्ष, पुणे जिल्हा गृहनिर्माण महासंघ