पुणे : ठेवीदारांची फसवणूक केल्याप्रकरणी बांधकाम व्यावसायिक दीपक कुलकर्णी (डीएसके) यांच्याविरोधात सुरू असलेल्या प्रकरणाची सुनावणी घेण्याचे अधिकार सध्या सुनावणी सुरू असलेल्या न्यायालयाला नाही. त्यामुळे प्रकरण दुस-या न्यायालयात चालविण्यात यावे, अशी मागणी करणारा अर्ज न्यायालयाने फेटाळला आहे. याच न्यायालयास सुनावणी घेण्याचा अधिकार आहे, असा आदेश न्यायालयाने दिला आहे.

ताज्या बातम्यांसाठी डाऊनलोड करा ई-सकाळचे ऍप

संबंधित अर्ज गुंतवणुकदारांच्यावतीने ऍड. चंद्रकांत बिडकर यांनी केला होता. विशेष न्यायाधीश जयंत राजे यांनी हा आदेश दिला. न्यायाधीश राजे यांच्या न्यायालयात या प्रकरणाची सुनावणी सुरू आहे. या न्यायालयास सुनावणी घेण्याची अधिकार नाही आणि सहा महिन्यांत निकाल द्यावा, अशा मागण्या करणा-या अर्ज ऍड. बिडकर यांनी केला होता. हे दोन्ही अर्ज न्यायालयाने फेटाळले आहेत.

क्षमता १२०० प्रवाशांची अन्‌ प्रवास केला फक्त १५ प्रवाशांनी

राज्य शासनाने जारी केलेल्या नियमानुसार छाननी करून हे प्रकरण चालवले जात आहे. त्याची सुनावणी लवकरात लवकर पूर्ण करण्याचा प्रयत्न करत आहेत. मात्र त्याची रोज सुनावणी घेणे अवघड आहे. कोरोनाच्या प्रभावामुळे सध्या केवळ महत्त्वाच्या खटल्यांवर सुनावणी घेण्यात येत आहे. या प्रकरणात पक्षकारांनी दाखल केलेल्या अर्जांची संख्या मोठी आहे. या सर्व परिस्थितीचा विचार करता सहा महिन्याच्या आत खटल्याचा निकाल लागणे शक्‍य नाही, असे न्यायालयाने दिलेल्या आदेशात नमूद आहे. पुरावे सादर होऊन प्रकरण अंतिम सुनावणीसाठी असताना ऍड. बिडकर त्यात विशेष सरकारी वकिलांनी मदत करू शकता. त्यांचे काही म्हणणे असेल तर त्यांनी ते त्यावेळी लेखी स्वरूपात सादर करावे, असे आदेश न्यायालयाने दिले आहेत.

(संपादन : सागर दिलीपराव शेलार)