खळद : कोरोना लसीकरण सुरू झाल्यावर पुरंदर तालुक्यात मार्च महिन्यात ४५ पेक्षा जास्त वय असणाऱ्या काही नागरीकांना कोव्हॅक्सिन लस देण्यात आली आहे. हे सर्व नागरिक आता दुसऱ्या डोससाठी लशीच्या प्रतिक्षेत आहेत, मात्र ही लस उपलब्ध होत नसल्याने नागरिक धास्तावले आहेत. मिळालेल्या माहितीनुसार, तालुक्यात ग्रामीण व शहरी भागात जवळपास २ हजार नागरीकांना ही देण्यात आली आहे. या नागरीकांना आता दुसरा डोस घेण्याचा कालावधी जवळपास संपत आला आहे. त्यामुळे येत्या एक दोन दिवसांत तातडीने ही लस उपलब्ध होणे गरजेचे आहे.

यासंदर्भात तालुका वैद्यकीय अधिकारी उज्वला जाधव यांच्याशी संपर्क केला असता, आम्ही वरिष्ठ कार्यालयात लशीची मागणी केली आहे, परंतु २ हजार लशीची आवश्यकता असताना संपूर्ण तालुक्यासाठी फक्त पन्नास लशी उपलब्ध झाल्या आहेत. नागरिकांचे पहिल्या लसीचे दिवस पाहून त्यांना संपर्क करून त्या आम्ही दिल्या आहेत. इतरांसाठी लस कधी उपलब्ध होईल हे मात्र सांगता येणार नसल्याचे त्यांनी सांगितले.