पुणे - कोरोनाचा प्रादुर्भाव रोखण्यासाठी पुणे शहरात लागू करण्यात आलेले निर्बंध एक जूनपर्यंत वाढविण्यात आले आहेत. याबाबतचे आदेश शुक्रवारी महापालिकेच्या अतिरिक्त आयुक्तांनी काढले. नव्या आदेशानुसार परराज्यातून पुणे शहरात येणाऱ्या प्रवाशांना ४८ तास आधी केलेल्या कोविड-१९ आरटीपीसीआर चाचणीचे निगेटिव्ह प्रमाणपत्र जवळ बाळगणे बंधनकारक केले आहे. शनिवारी आणि रविवारी अत्यावश्‍यक सेवा वगळता सर्व दुकाने बंद राहणार आहेत.

कोरोना प्रादुर्भाव रोखण्यासाठी पुणे महापालिकेकडून १५ मे पर्यंत शहरात कडक निर्बंध लागू करण्यात आले होते. या कालवधीत सोमवार ते शुक्रवार या काळात सकाळी सात ते अकरा या वेळेत अत्यावश्‍यक व जीवनावश्‍यक वस्तूंची दुकाने सुरू ठेवण्यास परवानगी दिली होती. शनिवारी आणि रविवारी कडक निर्बंध लागू करण्यात आले होते. दरम्यान, निर्बंधांची ही मुदत नव्याने १ जून सकाळी सातपर्यंत वाढविण्यात आली आहे. त्याबाबतचे आदेश शुक्रवारी सायंकाळी अतिरिक्त आयुक्त रूबल अग्रवाल यांनी काढले.

परराज्यातून पुण्यात येणाऱ्या नागरिकांना ४८ तास आधीचे कोरोना चाचणीचे निगेटिव्ह प्रमाणपत्र जवळ बाळगणे नव्याने बंधनकारक करण्यात आले आहे. तर माल वाहतूक करणाऱ्या वाहनांमधून केवळ दोनपेक्षा जास्त व्यक्तींना परवानगी देण्यात आली आहे. परराज्यातून माल घेऊन पुण्यात येणाऱ्या वाहनांनाही हे प्रमाणपत्र बाळगणे बंधनकारक करण्यात आले आहे. अत्यावश्‍यक सेवेतील कर्मचाऱ्यांना सार्वजनिक वाहतुकीतून प्रवास करण्यास परवानगी राहणार आहे.

असे असतील नवे आदेश

-सोमवार ते शुक्रवार सकाळी सात ते अकरा अत्यावश्‍यक व जीवनावश्‍यक वस्तूंची दुकाने सुरू राहणार

-शनिवार-रविवार कडक निर्बंध

-परराज्यातून पुणे शहरात माल घेऊन येणाऱ्या वाहनांनादेखील निगेटीव्ह प्रमाणपत्र बंधनकारक