महाळुंगे पडवळ (पुणे) : आंबेगाव तालुक्यातील दरेकरवस्ती- लौकी येथील राजेंद्र रामदास वाळूंज यांच्या गावठी गाईच्या गोठ्यात बिबट्याने शिरकाव करून हल्ला करण्याचा प्रयत्न केला. परंतु, गाईने केलेल्या प्रतिकारामुळे बिबट्याला पळ काढावा लागला. गोठ्यातील दहा कोंबड्या मात्र बिबट्याच्या शिकार झाल्या आहेत. रविवारी (ता. ५) बिबट्याला जेरबंद करण्यासाठी वनविभागाने पिंजरा लावला आहे.

महापौरांच्या कुटुंबातील आठ जण कोरोना पॉझिटिव्ह

लौकी- दरेकरवस्ती येथे राजेंद्र वाळूंज यांच्या घराशेजारीच पाच गावठी गाई व एक वासरू, असा एकूण सात जनावरांचा गोठा आहे. तसेच, ३५ एकर डाळिंबाची बागही घरासमोरच आहे. चोरट्याच्या उपद्रवामुळे गेल्या वर्षी त्यांचे डाळिंब पिकाचे नुकसान झाले होते. त्यामुळे या वर्षी त्यांनी घराभोवती व डाळिंब बागेभोवती सीसीटीव्ही कॅमेरे बसविले आहेत. विशेष म्हणजे कॅमेरे बसविल्यानंतर पहिल्याच दिवशी चोरट्यांऐवजी बिबट्याच दिसला. बिबट्या व गाईचा थरारही सीसीटीव्ही कॅमेऱ्यात कैद झाला आहे. बिबट्याने दहा कोंबड्या फस्त केल्या आहेत. या भागात बिबट्याचा नेहमीच वावर आहे. वाळूंज यांनी सदर घटना स्थानिक ग्रामस्थांद्वारे वनविभागाच्या अधिकाऱ्यांना कळविली होती.

पुण्याच्या बातम्या वाचण्यासाठी येथे ► क्लिक करा

वनरक्षक कैलास दाभाडे, कल्पना पांढरे, राजेंद्र गाढवे व कर्मचारी कोंडीभाऊ डोके यांनी घटनास्थळी भेट देऊन पाहणी केली. परिसरातील शेतामध्ये बिबट्याच्या पायाचे ठसे आढळून आल्याने ग्रामस्थांनी बिबट्याला जेरबंद करण्याची मागणी केली होती. त्यानुसार वनविभागाने बिबट्याला जेरबंद करण्यासाठी रविवारी परिसरात पिंजरा लावला आहे. पिंजऱ्यात सावज म्हणून शेळी ठेवण्यात आली आहे.