Cow Milk Rate Hike: गायीच्या दुधाच्या दरात आता २ रुपयांनी वाढ झाली आहे. त्यामुळं ग्राहकांना आता प्रतिलिटरमागे दोन रुपये जास्त मोजावे लागणार आहे. पुण्यात पार पडलेल्या दुध उत्पादकांच्या बैठकीत हा निर्णय घेण्यात आला आहे. (Cow Milk Rate Hike Increase in price by Rs 2 per litre)

गायीचं दूध आजपासून दोन रुपयांनी महागलं आहे. दूध पाऊच विक्री दरात दोन रुपयांनी दरवाढ करण्याचा निर्णय दूध उत्पादक व प्रक्रिया कल्याणकारी संघाच्या सभासदांनी घेतला असल्याचं माहिती संघाचे अध्यक्ष गोपाळराव म्हस्के यांनी दिली. पुणे जिल्हा दूध संघाच्या (कात्रज डेअरी) कार्यालयात झालेल्या बैठकीत हा निर्णय घेण्यात आला.

यावेळी राज्यातील विविध सहकारी व खाजगी संघांचे प्रतिनिधी उपस्थित होते. यामध्ये प्रामुख्यानं चितळे डेअरी, पराग मिल्क, गोविंद दूध, नेचर डिलाईट, उर्जा, राजहंस, संतकृपा, एसआर थोरात, कात्रज, गोदावरी, अनंत, सोनाई, अक्षरा मिल्क, सुयोग मिल्क आदी संघाचे प्रतिनिधी उपस्थित होते. ही दरवाढ गायीच्या दूधासाठी असणार आहे. याआधी साधारणतः ५४ रुपये दूध दर होता, आता तो २ रुपयांनी वाढल्याने ५६ रुपये होणार आहे.

शासनानं जाहिर केलेलं गाय दूध अनुदानाचं धोरण १ जुलै २०२४ पासून लागू केलेलं आहे. त्यानुसार दूध खरेदी दरात तीन रुपयांची वाढ ही सर्व संघांना स्वतः द्यावी लागणार आहे. तीन रुपयांची खरेदी दरात वाढ झालेली असली तरीही विक्री दरात मात्र दोन रुपये वाढ करण्याचा निर्णय सर्वानुमते घेण्यात आल्याचं संघाचे सचिव प्रकाश कुतवळ यांनी सांगितलं.

दूध विक्रीची सद्यस्थिती

• राज्यभरात एकूण विक्री होणारे दूध - ६५ ते ७० लाख लिटर

• कल्याणकारी संघाच्या माध्यमांतून होणारी विक्री - ४० ते ४२ लाख लिटर

• पुणे शहरात विक्री होणारे दूध - १८ ते २० लाख लिटर

• संघाच्या माध्यमांतून पुणे शहरात होणारी विक्री - १२ ते १३ लाख लिटर

• पिशवीबंद दुधाची उपलब्धता- पाव, अर्धा आणि एक लिटर पॅक

• पिशवीबंद गायीच्या नव्या दूधाचा दर - ५६ रुपये