पुणे - मुल होत नसल्याने जादूटोणा (Black Magic) तसेच अघोरी उपाय करून सुनेचा छळ केल्याप्रकरणी बांधकाम व्यावसायिकासह आठ जणांवर गुन्हा (Crime) दाखल करण्यात आला आहे.

या प्रकरणी बांधकाम व्यावसायिक, त्याचे कुटुंबीय आणि एका गुरुजीविरोधात विवाहितेचा छळ, फसवणूक तसेच जादूटोणा कायद्यानुसार गुन्हा दाखल करण्यात आला आहे. बांधकाम व्यावसायिकाच्या सुनेने याबाबत कोथरूड पोलिस ठाण्यात वेगवेगळ्या फिर्यादी दिल्या आहेत. गेल्या वर्षी मे महिन्यात तक्रारदार महिलेचा विवाह बांधकाम व्यावसायिक यांचा मुलगा याच्याशी झाला होता. लग्न ठरविताना त्याने स्थापत्य अभियांत्रिकी विषयात पदवी मिळाल्याचे सांगण्यात आले.

मात्र, प्रत्यक्षात तो केवळ दहावी उत्तीर्ण आहे. विवाहानंतर वेगवेगळ्या कारणावरून वाद घालून छळ करण्यात आला, असे फिर्यादीत म्हटले आहे. अपत्य प्राप्ती होत नसल्याने आरोपींनी जादूटोणा तसेच अघोरी उपाय करण्यास सुरवात केली. आरोपी गुरुजी यांनी मंत्र-तंत्राच्या नावाखाली छळ केला, असेही फिर्यादीत म्हटले आहे. दरम्यान, बांधकाम व्यावसायिकाच्या मुलाच्या पत्नीने छळ प्रकरणात आणखी एक स्वतंत्र फिर्याद दिली असून तिने दिलेल्या फिर्यादीनुसार गुन्हा दाखल करण्यात आला आहे. कोथरूड पोलिस ठाण्याचे वरिष्ठ पोलिस निरीक्षक महेंद्र जगताप आणि गुन्हे शाखेचे निरीक्षक बाळासाहेब बढे तपास करत आहेत.