नसरापूर, ता. ४ ः मनुस्मृतीचा अभ्यासक्रमात समावेश होत असल्याच्या निषेधार्थ रविवारी (ता. २) जून रोजी खेड शिवापूर टोलनाका येथे रिपब्लिकनच्या कार्यकर्त्यांनी आंदोलन केले होते. परवानगी न घेता आंदोलन करून सरकार विरोधी घोषणा देत प्रतिकात्मक पुतळ्याचे दहन केल्याप्रकरणी राजगड पोलिस ठाण्याच्या वतीने गुन्हा दाखल करण्यात आला आहे.
राज्य शासन पहिली ते बारावीच्या अभ्यासक्रमात मनुस्मृतीचा समावेश करून जातीयवाद निर्माण करत आहे असा आरोप करत भोर, राजगड (वेल्हे) व हवेली येथील रिपब्लिकन कार्यकर्त्यांनी टोलनाका येथे जमून शासनाच्या विरोधात आंदोलन केले. मात्र या आंदोलनास कोणतीही परवानगी देण्यात आली नसल्याचे सांगून राजगड पोलिसांनी याबाबत कारवाई सुरू केली आहे. राजगड पोलिस ठाण्याचे हवालदार भागिरथ घुले यांनी याबाबत फिर्याद दिली आहे. प्रवीण सदाशिव ओव्हाळ (रा. खेड शिवापूर), विनोद गायकवाड, अविनाश गायकवाड, नवनाथ कदम, किशोर अमोलिक, मिलिंद जगताप, महेंद्र साळुंखे, अभिषेक वैराट, सागर जगताप, आकाश गायकवाड, आकाश कांबळे या विविध पदावरील पदाधिकाऱ्यांसह इतर कार्यकर्त्यांनी एकत्र येत बेकायदेशीर जमाव जमवून शासनाच्या निषेधार्थ घोषणाबाजी, भाषणे करून भित्तिपत्रके फाडून निदर्शन आंदोलन करून आंदोलनाच्या शेवटी अचानक प्रतिकात्मक पुतळा आणून त्यास पेटवून सरकारविरोधी घोषणा दिल्याचे फिर्यादीत नमूद करण्यात आले. त्यानुसार गुन्हा दाखल करण्यात आला आहे. याप्रकरणाचापुढील तपास फौजदार दाजी देठे करत आहेत