पुणे : घरफोड्या आणि चोरीच्या गुन्ह्यातील सराईत गुन्हेगाराला गुन्हे शाखेच्या (Crime Branch) युनिट तीनच्या पथकाने अटक केली. त्याच्या ताब्यातून दोन पिस्तूल, चार जिवंत काडतुसे आणि दुचाकी असा मुद्देमाल जप्त केला आहे. रोहन ऊर्फ दुध्या सुभाष चव्हाण (वय ३७, रा. दारूवाला पूल, सोमवार पेठ) असे अटक केलेल्याचे नाव आहे.

त्याच्याविरुद्ध जबरी चोरी, घरफोडी आणि बेकायदा पिस्तूल बाळगल्याप्रकरणी गुन्हे दाखल आहेत. तो मध्यप्रदेशातून (Madhya Pradesh) पिस्तूल आणून गुंड टोळ्यांना विक्री करीत असल्याची माहिती युनिट तीनचे सहाय्यक पोलिस फौजदार सुनील पवार आणि संतोष क्षीरसागर यांना मिळाली. त्यानुसार पोलिसांनी त्याला एरंडवणे भागातील डीपी रस्त्यावर सापळा रचून पकडले.

त्याच्याकडे देशी बनावटीच्या दोन पिस्तुलांसह चार काडतुसे आढळली. पोलिस उपायुक्त अमोल झेंडे, सहायक पोलिस आयुक्त सुनील तांबे यांच्या मार्गदर्शनाखाली पोलिस निरीक्षक श्रीहरी बहिरट, सुनील पवार, संतोष क्षीरसागर, शरद वाकसे, पांडुरंग कामतकर, किरण पवार, संजीव कळंबे, सुजीत पवार यांनी ही कारवाई केली.