Sinhgad Dhayari : चित्रपटात दाखवतात त्याप्रमाणे गंडा घालत वाहन चोरी करून नंतर ते भंगार मध्ये विकणे आणि पैसा कमवणाऱ्या प्रत्यक्षातील 'बंटी-बबली' ला सिंहगड पोलिसांनी अखेर गजाआड केले

सिंहगड रस्ता पोलीसांनी वाहनचोरी करणाऱ्या पती-पत्नीकडून ८ चारचाकी आणि ९ मोटार सायकली असे एकूण १७ वाहनांच्या चोरीचे गुन्हे उघड केलेत.

सुमारे १२,७०,००० रुपये किंमतीचा मुद्देमाल जप्त केला.  'बंटी अ‍ॅंड बबली' स्टाईलने ते चोऱ्या करत होते. यातील महिलेची नुकतीच प्रसुती झाली असून दीड महिन्याचे बाळ आहे. शाहरुख राजू पठाण आणि आयेशा शाहरुख पठाण (वय २१, दोघेही राहणार कुंजीर नगर, मूळ पत्ता वार्ड नंबर ५ निरा, ता. बारामती) अशी आरोपींची नावे आहेत.

दोघेही सराईत असून दोघांवर विविध पोलीस ठाण्याच्या हद्दीत गुन्हे दाखल आहेत. फेब्रुवारी महिन्यात ते तुरुंगातून जामिनावर सुटले आहेत. आयेशा ही गर्भवती असताना सुद्धा चोऱ्यांच्या उद्योगात सामील होत होती.

तपास पथकातील पोलीस अंमलदार उत्तम तारु, राहुल ओलेकर, शिवाजी क्षिरसागर यांना माहिती मिळाली की, एक पुरुष आणि एक महिला संशयास्पद रित्या लोणीकाळभोर येथील वडकीनाला भागामध्ये रस्त्याच्या कडेला एका कारमध्ये बसले आहे. दोघे मिळून चारचाकी आणि दुचाकी वाहन चोरी गुन्हे करत आहेत.

सहाय्यक पोलीस निरीक्षक सचिन निकम, पोलीस उप निरीक्षक संतोष भांडवलकर आणि त्यांच्या पथकाने या दोन संशयीतांना ताब्यात घेतले.‌ अटक करुन चौकशी केली असता, आरोपींनी संपूर्ण पोलीस आयुक्तालयात हद्दीत १७ दुचाकी व चारचाकी वाहन चोरीचे गुन्हे केल्याची कबुली दिली.

त्यातील चोरी केलेल्या एकुण ८ चारचाकी व ९ दुचाकी वाहने असा मुददेमाल आरोपींनी जप्त केला. आरोपी पती पत्नी असून ते पुणे शहरामध्ये वेगवेगळ्या ठिकाणी लॉजवर राहून दिवसभर टेहळणी करत. रात्री बाहेर पडून चारचाकी, दुचाकी वाहने चोरी करत.

दोघे गाडीत असल्याने कोणालाही संशय येत नसे. ही वाहने आरोपींनी नागपूर, शिर्डी, श्रीरामपूर येथे विकली होती. गुन्हयातील एकुण १७ वाहने असे एकुण १२,७०,००० किंमतीचा मुददेमाल जप्त करण्या आला आहे.

सचिन निकम आणि संतोष भांडवलकर यांच्या पथकाने सलग दोन महिने दोघा आरोपींचा मागोवा घेतला. ही कामगिरी पोलीस आयुक्त अमितेश कुमार सह आयुक्त प्रविण पवार, अप्पर पोलीस आयुक्त, पश्चिम प्रादेशिक विभाग प्रविणकुमार पाटील, पोलीस उप-आयुक्त परीमंडल ३ संभाजी कदम, सहाय्यक पोलीस आयुक्त जगदीश सातव वरीष्ठ पोलीस निरीक्षक विजय कुंभार यांच्या मार्गदर्शनाखाली करण्यात आली.

पोलीस अंमलदार आबा उत्तेकर, संजय शिंदे, उत्तम तारु, राजु देगरे, विकास बांदल, अमोल पाटील, विकास पांडोळे, देवा चव्हाण, शिवाजी क्षीरसागर, राहुल ओलेकर, सागर शेडगे, स्वनील मगर, विनायक मोहिते, शिरीष गावडे या पथकाने सहभाग घेतला.