पुणे : आरोग्यास घातक गुटखा, सुगंधी सुपारी आणि पानमसाला विक्रेत्यांवर पुणे पोलिसांनी मोहीम सुरू केली आहे. शहरात गुटख्याचा साठा केलेली गोदामे आणि विक्रेत्यांवर पोलिसांनी छापे टाकून तीन लाखांचा गुटखा जप्त केला आहे. याप्रकरणी ३२ जणांवर गुन्हा दाखल करुन २२ जणांना अटक केली आहे.

पोलिसांनी शहरातील फरासखाना, डेक्कन, शिवाजीनगर, समर्थ, सहकारनगर, भारती विद्यापीठ, दत्तवाडी, वारजे, उत्तमनगर, कोथरुड, सिंहगड, चतु:श्रृंगी, चंदननगर, विमानतळ, येरवडा, विश्रांतवाडी, मुंढवा, लोणी काळभोर, हडपसर पोलिस ठाण्याच्या हद्दीत अवैध गुटखा विक्री करणाऱ्या आणि साठा करुन ठेवणाऱ्यांवर गुरुवारी (ता.२) छापे टाकले. या कारवाईत दोन लाख ९७ हजार रुपयांचा गुटखा जप्त करून २२ जणांना अटक केली आहे.