पुणे : अल्पवयीन मुलीने इमारतीच्या चौदाव्या मजल्यावरुन उडी मारून आत्महत्या केल्याचा धक्कादायक प्रकार उघडकीस आला आहे. हि घटना शुक्रवारी सकाळी 10 वाजण्याच्या सुमारास हडपसर येथील ऍमनोरा पार्क परिसरात घडली. बारावीच्या सराव परिक्षेत अपेक्षेपेक्षा कमी गुण मिळाल्याच्या कारणावरुन मुलीने आत्महत्या केली असल्याची प्राथमिक माहिती पुढे आली असल्याचे पोलिसांनी सांगितले. अवंतीका कुलशेखर (वय 17, रा. ऍमनोरा पार्क परिसर, हडपसर) असे आत्महत्या केलेल्या मुलीचे नाव आहे. याप्रकरणी हडपसर पोलिस ठाण्यात अकस्मात मृत्युची नोंद करण्यात आली आहे.

वरिष्ठ पोलिस निरीक्षक अरविंद गोकुळे यांनी दिलेल्या माहितीनुसार, अवंतिका तिचे आई-वडील व छोट्या भावासमवेत ऍमनोरा पार्क परिसरातील एका इमारतीमध्ये राहते. अवंतिका इयत्ता बारावीमध्ये शिक्षण घेत होती. दरम्यान, शुक्रवारी सकाळी तिच्या शाळेमध्ये भरविण्यात आलेल्या पालक मेळाव्यासाठी तिचे आई-वडील गेले होते. तर लहान भाऊ हा शाळेत गेला होता. त्यामुळे अवंतिका घरी एकटीच होती. तिचे आई-वडील पालक मेळाव्यावरुन आले होते. ते इमारतीच्या लिफ्टमधून येत असतानाच तिने घराचा दरवाजा आतुन बंद केला. त्यानंतर इमारतीच्या चौदाव्या मजल्यावर असलेल्या त्यांच्या घरातुन खाली उडी मारुन आत्महत्या केली. अवंतिकाला बारावीच्या सराव परिक्षेत कमी गुण मिळाले होते, त्यामुळे तिने आत्महत्या केली असल्याची प्राथमिक माहिती पुढे आली आहे. या प्रकरणाचा तपास हडपसर पोलिस करीत आहेत.