भोर ः येथील पोलिस कोठडीचे लोखंडी गज कापून पळून गेलेल्या मोक्का गुह्यातील दोन आरोपींपैकी एकास स्थानिक गुन्हे शाखेने गुरुवारी (ता. १५) दुपारी पकडले. चंद्रकांत लोखंडे (वय ३२, रा. ढवळ, ता. फलटण. जि. सातारा) असे अटक केलेल्या आरोपीचे नाव असून १७ फेब्रुवारीला तो प्रवीण राऊत या साथीदारासोबत पोलिस कोठडीचे गज कापून पलायन केले होते. त्यांनी पोलिसांच्या वेशात कापूरव्होळ (ता.भोर) येथील ज्वेलर्सच्या दुकानात दिवसाढवळ्या दरोडा टाकला होता.

चंद्रकांत लोखंडे हा मुंबईहून कर्नाटकला खासगी ट्रॅव्हल बसमधून निघाला असल्याची माहिती स्थानिक गुन्हे शाखेला मिळाली. त्यानुसार पोलिसांनी पाठलाग करून खेड-शिवापूर येथे गाडी थांबवून त्यास अटक केली. पुढील कारवाईसाठी त्यास राजगड पोलिसांच्या ताब्यात देण्यात आले.

पोलिस अधीक्षक डॉ. अभिनव देशमुख, अप्पर पोलीस अधीक्षक विवेक पाटील यांच्या मार्गदर्शनाखाली स्थानिक गुन्हे शाखेचे पोलीस निरीक्षक पदमाकर घनवट, पोलिस उपनिरीक्षक अमोल गोरे पोसई, रामेश्वर धोंडगे पोना, राजू मोमीन, अमोल शेडगे, मंगेश भगत, बाळासाहेब खडके, अक्षय नवले, अक्षय जावळे व प्रसन्नजित घाडगे यांनी ही कामगीरी केली.