पुणे ः विद्यापीठ अनुदान आयोगाच्या नेट (यूजीसी नेट) परीक्षेनंतर आता सीएसआयआर नेट परीक्षाही रद्द झाली आहे. येत्या २५ ते २७ जून दरम्यान होणारी सीएसआयआर नेट आता अनिश्चित काळासाठी पुढे ढकलण्यात आली आहे. राष्ट्रीय चाचणी संस्थेतर्फे (एनटीए) शुक्रवारी या संदर्भात परिपत्रक प्रसिद्ध करण्यात आले आहे.

वैद्यकीय अभ्यासक्रमांची प्रवेश परीक्षा ‘नीट’ आणि यूजीसी ‘नेट’ परीक्षेतील पेपर फुटी प्रकरणामुळे एनटीए वादात सापडली आहे. यूजीसी नेटचा पेपर ‘डार्क नेट’वर आढळल्याने २४ तासांच्या आत ती परीक्षा रद्द करण्यात आली होती. त्यामुळे सायबर सुरक्षेपासून पेपरफुटी पर्यंत विविध प्रश्न सध्या अनुत्तरीत आहे. परीक्षा पद्धतीतील कच्चे दुवे आणि दुबळ्या यंत्रणेचा परिणाम परीक्षेच्या आयोजनावर होत असून, विद्यार्थ्यांच्या करिअरवर त्याचा दुष्परिणाम होत आहे. सीएसआयआर नेट पुढे ढकलताना एनटीएने नव्या तारखे संदर्भात कोणतीच घोषणा केलेली नाही. लॉजिस्टीक समस्येमुळे परीक्षा पुढे ढकलत असून, विद्यार्थ्यांनी अधिकृत संकेतस्थळाला भेट द्यावी.