पुणे - निसर्ग चक्रीवादळामुळे नुकसान झालेल्या पुणे जिल्ह्यातील शाळा, अंगणवाड्या, ग्रामपंचायत मुख्यालय, प्राथमिक आरोग्य केंद्र आणि स्मशानभूमी शेडच्या दुरुस्तीसाठी ११ कोटी ५७ लाख ८६ हजार रुपये खर्च करावे लागणार आहेत. 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

याबाबतच्या दुरुस्ती प्रस्तावांना मुख्य कार्यकारी अधिकारी आयुष प्रसाद यांनी तांत्रिक मंजुरी दिली आहे. यासाठी आता जिल्हाधिकारी नवल किशोर राम यांच्याकडे निधी मागणी प्रस्ताव पाठविण्यात येणार आहे.

जिल्हा परिषदेच्यावतीने नुकसान झालेल्या शाळा, अंगणवाड्यांच्या दुरुस्तीसाठीचे अंदाजपत्रक (एस्टिमेट) तयार करण्यासाठी दोन दिवस विशेष मोहिम राबविण्यात आली. या मोहिमेंतर्गत बांधकाम विभागातील सर्व शाखा अभियंते, कनिष्ठ अभियंत्यांवर तालुकानिहाय जबाबदारी सोपविण्यात आली होती. दोन दिवसांच्या मोहिमेनंतर लगेचच या प्रस्तावांना तांत्रिक मान्यता देण्यात आली आहे.

वेल्ह्यातील नागरिकांसाठी या बारा जणांचा अहवाल ठरला... 

या तांत्रिक मान्यतेनंतर आता या प्रस्तावांना बांधकाम समितीची मान्यता घेण्यात येईल. त्यानंतर जिल्ह्याला नुकसान भरपाईसाठी मिळालेल्या खास पॅकेजमधून निधी उपलब्ध करून देण्याची मागणी जिल्हा परिषदेच्यावतीने जिल्हाधिकारी राम यांच्याकडे केली जाणार आहे.

या चक्रीवादळामुळे पुणे जिल्ह्यातील ३१६ प्राथमिक शाळा, १५७ अंगणवाड्या, १५ ग्रामपंचायती, १४ प्राथमिक आरोग्य केंद्र, एक पशुवैद्यकीय दवाखाना आणि  २२ स्मशानभूमी शेडचे नुकसान झाले आहे. दोन जूनला हे चक्रीवादळ आले होते.

पुणेकरांसाठी गुडन्यूज! लोहगाव विमानतळावरून उबेरची कॅब सर्व्हिस पुन्हा सुरू

संस्थानिहाय दुरुस्ती खर्च (रुपयांत) 
- प्राथमिक शाळा --- ८ कोटी ९ लाख.
- अंगणवाडी --- १ कोटी ६८ लाख ६४ हजार.
- ग्रामपंचायत मुख्यालय --- ५१ लाख ८ हजार.
- आरोग्य केंद्र --- ६० लाख ६४ हजार.
- पशूवैद्यकीय दवाखाना ---- सहा लाख.
- स्मशानभूमी शेड ---- ६२ लाख ५० हजार.
- एकूण ---- ११ कोटी ५७ लाख ८६ हजार.

निसर्ग चक्रीवादळामुळे नुकसान झालेल्या सर्व जिल्हा परिषदेच्या अख्त्यारितील इमारतींच्या दुरुस्तीचे अंदाजपत्रक तयार केले आहे. त्यास तांत्रिक मान्यता देण्यात आली आहे. याशिवाय खासगी मालकीची घरे, अन्य इमारती यांच्याही  नुकसानीचे पंचनामे केले आहेत.
- आयुष प्रसाद, मुख्य कार्यकारी अधिकारी, जिल्हा परिषद, पुणे.