उरुळी कांचन (पुणे) : सासरी असणाऱ्या बहिणीला व भाच्यांना भेटण्यासाठी गेलेल्या मेहुण्यांवर दाजीने तलवारीने वार केल्याची घटना शिंदवणे (ता. हवेली) येथे सोमवारी (ता. १५ ) संध्याकाळी साडेसात वाजण्याच्या सुमारास घडली आहे. प्रकाश भिवा खेडेकर (रा. शिंदवणे, ता. हवेली) असे वार केलेल्या दाजीचे नाव आहे. 

याप्रकरणी मेहुणे भाऊसाहेब मुळलीधर खेनट (वय- ३८, रा. पिंपळे, ता. पुरंदर) यांनी लोणी काळभोर पोलीस ठाण्यात  फिर्याद दिली आहे. 

- पुण्याच्या बातम्या वाचण्यासाठी येथे ► क्लिक करा

पोलिसांनी दिलेल्या माहितीनुसार भाऊसाहेब खेनट हे ड्रायव्हर आहेत. भाऊसाहेब यांची मोठी बहीण उज्वला खेडेकर व दाजी प्रकाश खेडेकर यांच्यात सतत भांडणे होत होती. त्यामुळे उज्वला मागील तीन महिन्यांपासून तिच्या तीन मुलांसह पिंपळे (ता. पुरंदर) या ठिकाणी राहत होती. भाऊसाहेब हे बहिण उज्वला व तिच्या मुलांना मागील दहा दिवसांपूर्वी सासरी शिंदवणे या ठिकाणी सोडवून आले होते. 

पुणे विद्यापीठाचा कोट्यवधींचा निधी राज्य सरकारकडे थकीत; रक्कम ऐकून बसेल धक्का!

मंगळवारी (ता. १६) संध्याकाळी साडेसातच्या सुमारास उज्वला व तिच्या मुलांना भेटण्यासाठी भाऊसाहेब हे त्यांच्या दोन मुलांसोबत गेले होते. घरामध्ये प्रवेश करणार त्याच वेळी दाजी प्रकाश खेडेकर यांनी भाऊसाहेबांना पाहिले व म्हणाले की तू आमच्या घरामध्ये यायचे नाही असे म्हणून शिवीगाळ करण्यास सुरुवात केली. 

दरम्यान, शिवीगाळ करत असताना प्रकाश खेडेकर हा घरांमध्ये गेला व घरामधून तलवार घेऊन आला. तलवारिने मारहाण करणार म्हणून त्याच्या हातातील तलवारीचे पाते भाऊसाहेबांनी दोन्ही हातांनी पकडले. त्यावेळी दोघांमध्ये धरपकड झाली व त्या धरपकडीत भाऊसाहेब यांच्या डाव्या हाताच्या तीन बोटांना व उजव्या अंगठयाला गंभीर दुखापत झाली. उपचारासाठी खेनट हे खाजगी रुग्णालयात दाखल झाले. 

(संपादन : सागर डी. शेलार)