पिरंगुट : मुळशी तालुक्यात पावसाने पाठ फिरविली असून भातरोपांना त्याचा मोठा फटका बसण्याचा धोका निर्माण झाला आहे. त्यामुळे मुळशीतील शेतकरी मोठ्या व संततधार पावसाच्या प्रतिक्षेत आहेत. तालुक्यातील भात पेरणी उरकत आलेली आहे. बहुतांशी शेतकऱ्यांनी भाताच्या रोपांची पेरणी केली असून सुमारे ऐंशी टक्के शेतकऱ्यांची भात रोपे लागवडीसाठी योग्य झाली आहेत. मात्र, गेल्या आठवडाभर मुळशीत पाऊस झालाच नाही. त्यामुळे पावसाअभावी भात रोपे असलेली खाचरे रखरखीत झाली आहेत.
ताज्या बातम्यांसाठी डाऊनलोड करा ई-सकाळचे ऍप   

तीव्र उन्हाचा चटका लागल्याने पाण्याचा टिपूसही शेतात राहिला नाही. त्यामुळे भातरोपे कोमेजून जाऊ लागली असून काही ठिकाणी पिवळी पडू लागली आहेत. त्यामुळे केवळ पाऊस न पडल्याने मुळशीतील भातरोपे पाण्याअभावी करपण्याचा धोका निर्माण झाला आहे. आठवडाभरात पाऊस झाला नाही तर कदाचित येथील शेतकऱ्यांवर दुबार पेरणीची वेळ येण्याचा धोका निर्माण झाला आहे.

पुण्याच्या बातम्या वाचण्यासाठी येथे ► क्लिक करा

मुळशीच्या पूर्व पट्ट्यातील ही परिस्थिती आता पश्चिम पट्ट्यातही निर्माण होऊ लागली आहे. मुठा खोरे, मोसे खोरे तसेच पिरंगुट, लवळे परिसरातील अनेक ठिकाणी भातरोपे पिवळी पडू लागली असून काही ठिकाणी सुकू लागली आहेत. ज्या शेतकऱ्यांकडे पाणी उपलब्ध आहे त्यांनी पंपाच्या साह्याने खाचरात पाणी आणून भात लागवड सुरू केली आहे.

पिंपरी चिंचवडच्या बातम्या वाचण्यासाठी येथे ► क्लिक करा

डावजे (ता.मुळशी) येथील शेतकरी विठोबा मानकर म्हणाले, "आमची भात रोपे लागवडीसाठी तयार झाली असली तरी पाण्याअभावी लागवड खोळंबली आहे. पंपाच्या साह्याने जरी खाचरात पाणी सोडले तरी ते केवळ दोनच दिवस टिकते. दोन दिवसानंतर पुन्हा खाचराला भेगा पडायला सुरवात होते. त्यामुळे भात लागवडीसाठी पावसाच्या पाण्याशिवाय पर्यायच नाही. येत्या दोन दिवसांत पाऊस झाला नाही तर सध्याची भात रोपे जळून जातील इतकी बिकट परिस्थिती निर्माण झाली आहे. त्यामुळे दुबार पेरणीचा धोकाही निर्माण झाला आहे."  
पुण्याची पीएमपी व्हेंटिलेटरवर; करार रद्द करण्यासाठी कंत्राटदारांना नोटिस