दौंड , ता. ९ : दौंड शहरातून जाणाऱ्या अष्टविनायक मार्गावर झालेल्या रस्ते अपघातात एका दुचाकीस्वार तरुणाचा मृत्यू झाला आहे. दौंड पोलिसांनी आज (ता. ९) या बाबत माहिती दिली. स्वप्नील बाळासाहेब चोरमले (वय २८, रा. तामखडा, पाटस, ता. दौंड) असे त्या तरुणाचे नाव आहे. शुक्रवारी ( ता. ८) दुपारी शहरातील दौंड तालुका कृषी उत्पन्न बाजार समिती मुख्यालयासमोरील रस्त्यावर हा अपघात झाला. स्वप्नील चोरमले हा देऊळगाव राजे येथून दौंड मार्गे पाटसकडे दुचाकीवर निघाला असता त्याला एका अज्ञात पीकअपने समोरून धडक दिली. त्यात त्याचा जागीच मृत्यू झाला. अपघातानंतर पिकअपचा चालक वाहनासह पसार झाला. दौंड पोलिस ठाण्यात या प्रकरणी अक्षय कोळेकर यांनी दिलेल्या फिर्यादीनुसार अज्ञात वाहनचालकाविरुद्ध गुन्हा दाखल करण्यात आला आहे.