दौंड, ता. १८ : दौंड रेल्वे स्थानकावर महिला प्रवाशाची पाच तोळे वजनाचे सोन्याचे दागिने असलेली पर्स चोरीला गेली. ही घटना शनिवारी (ता. १६) पहाटे घडली. शारदा अर्जुन राजगुरू (रा. काटेवाडी, ता. बारामती) या मुंबई-सोलापूर सिद्धेश्वर एक्स्प्रेसने दौंड स्थानकावर बारामतीकडे जाण्यासाठी उतरल्या होत्या. बारामतीकडे जाणाऱ्या गाडीला वेळ असल्याने त्या पतीसह फलाट क्रमांक ४ वर थांबल्या होत्या. दरम्यान, शारदा पहाटे पावणेचार वाजता मोबाइल ठेवण्यासाठी पर्स शोधत असताना त्यांना ती चोरीस गेल्याचे लक्षात आले. या पर्समध्ये पाच तोळे वजनाचे सोन्याचे मंगळसूत्र, हार, पदक, कर्णफुले व नथ आणि चांदीचे दागिने होते. चोरीस गेलेल्या दागिन्यांचे मूल्य तीन लाख २७ हजार रुपये असल्याचे फिर्यादीत नमूद करण्यात आले आहे.