Pune Rural Police news: पुण्याच्या दौंड तालुक्यातील कला केंद्रात गोळीबार झाल्याची पुणे ग्रामीण पोलिसांकडून पुष्टी करण्यात आली आहे. हवेत गोळीबार झाल्याचे पुणे पोलिसांनी सांगितले आहे. तर गोळीबार नेमका कुणाकडून केला गेला याबद्दल अद्याप तपास सुरू आहे.

दौंड तालुक्यातील चौफुल्याच्या तीन कला केंद्रांपैकी कोणत्या कला केंद्रात गोळीबार झाला याबद्दल पोलिसांकडून चौकशी करण्यात येत आहे. तपासासाठी चौफुल्याच्या अंबिका कला केंद्रात अप्पर पोलीस अधीक्षक दाखल झाले आहेत. पण यामध्ये राजकीय पक्षाच्या पदाधिकाऱ्याशी संबंधित व्यक्तीने गोळीबार केल्याचं म्हटलं जात आहे. या घटेनंतर यवत पोलिसांचे पथक घटनास्थळी दाखल झाले.

चौफुला कलाकेंद्रात गोळीबार झाल्याची माहिती समोर आली होती. मात्र गोळीबाराचे कोणतेही सबळ पुरावे मिळाले नाहीत, असं पोलिसांचं म्हणणं होतं. शिवाय थिएटर मालकाकडूनही असं काही घडलंच नाही असं सांगण्यात आल्याचंही पोलिसांनी म्हटलं होतं.

याशिवाय गोळीबाराच्या घटनेत डान्स करणारी तरुणी जखमी झाली असल्याची शक्यता व्यक्त केली जात होती. पोलिसांनी या घटनेच्या चौकशीसाठी सीसीटीव्हींची तपासणी सुरू केली आहे. या घटनेत सत्ताधारी पक्षातील बड्या नेत्याचा संबंध असल्याची चर्चा आहे.

सत्ताधारी आमदारचा भाऊ आणि त्याच्या मित्रांनीच हा राडा केल्याचा संशय आहे. आमदाराच्या भावाच्या मित्राने गोळीबार केल्याचं म्हटलं जातं होतं. त्यानंतर आता पोलिसांकडूनही गोळीबार झाल्याची पुष्टी केली गेली आहे.