शिनोली - जंगलात रानभाज्या काढण्यासाठी गेलेल्या कानसे ता. आंबेगाव येथील अजय शशिकांत कराळे (वय २३) या युवकाचा कड्यावरून पडून मृत्यू झाला आहे. अजय कराळे,अक्षय कराळे व संतोष चपटे असे तिघे मिळून डोंगरामध्ये चाव्याचे कोंब व कोळूची भाजी काढण्यासाठी गेले होते.

पाऊस पडत असल्याने डोंगर वाटा व कडे निसरडे झाले होते. यामध्ये एका अवघड वळणावर अजय कराळे याचा पाय घसरून तो २५ ते ३० फूट खाली पडला. यामध्ये त्याच्या डोक्याला मार लागला व हात फॅक्चर झाला.

सोबत असल्या दोघा मित्रांनी त्याला तात्काळ डोंगरावरून खाली आणून घोडेगाव ग्रामिण रुग्णालयात हलवले. मात्र तोपर्यंत त्यांनी आपला जीव सोडला होता. डोक्याला जबर मार लागल्याने त्याचा मृत्यू झाला. अजय कराळेचा असा अचानक मृत्यू झाल्याने संपूर्ण गावावर शोककळा पसरली असल्याचे आंबेगाव तालुका बाजार समिती संचालक संदीप चपटे यांनी सांगितले.