पुणे : बंद सदनिकेमध्ये एका वृद्ध दाम्पत्याचा मृतदेह आढळून आले. त्यांचे मृतदेह कुजलेल्या अवस्थेत होते. त्यामुळे त्यांचा मृत्यू काही दिवसांपूर्वीच झाला असण्याची शक्यता पोलिसांनी वर्तविली आहे. तसेच शवविच्छेदनानंतर मृत्यूचे कारण कळेल असे पोलिसांनी सांगितले. शिवाजीनगर गावठाण परिसरात घडलेली ही घटना शनिवारी सायंकाळी घडकीस आली.

ताज्या बातम्यांसाठी डाऊनलोड करा ई-सकाळचे ऍप   

संभाजी बापू शिंदे (वय 75) व शोभा संभाजी शिंदे (वय 70) अशी मृत्यू झालेल्या व्यक्तींची  नावे आहेत. पोलिसांनी दिलेल्या प्राथमिक माहितीनुसार, शिंदे दाम्पत्याला मुलबाळ नव्हते, ते दोघेच गावठाण परिसरातील एका इमारतीच्या पहिल्या मजल्यावरील सदनिकेत राहत होते. त्यांचे नातेवाईक त्यांच्याकडे दर दहा ते पंधरा दिवसानी ये-जा करत होते. तसेच फोनवर त्यांच्याशी संपर्कत होते. परंतु मागील आठ दिवसापासून त्यांचा फोन लागत नव्हता. त्यामुळे शोभा शिंदे यांच्या बहिणीची मुलगी शनिवारी त्यांच्यासाठी जेवणाचा डब्बा घेऊन त्यांना भेटण्यासाठी आली होती. अनेकदा दरवाजा वाजवून देखील आतून कोणताच प्रतिसाद मिळत नाही हे लक्षात आल्यानंतर तिने शेजाऱ्यांना बोलावून दरवाजा तोडला. त्यावेळी दोघेही मृतावस्थेत आढळून आले.

पुण्याच्या बातम्या वाचण्यासाठी येथे ► क्लिक करा

स्थानिक नागरिकांनी याबाबत तत्काळ पोलिसांना माहिती दिली. पोलिसांनी घटनास्थळी दाखल झाल्यानंतर त्यांनी दोघांचे मृतदेह शवविच्छेदनासाठी ससून रुग्णालयात पाठवले. दोघांचे मृतदेह कुजलेल्या अवस्थेत होते. तसेच त्यांच्या मृतदेहाजवळ रक्तदाबाच्या गोळ्य मिळून आल्या आहेत. त्यांच्या मृत्यूचे नेमके कारण शवविच्छेदनानंतरच समोर येईल. दोघेही कचरा टाकायचा असेल तरच बाहेर येत असत. त्यामुळे हा प्रकार लवकर लक्षात आला नाही. दोघाचा मृत्यू पाच सहा दिवसापुर्वी झाला असल्याची शक्यता पोलिसांनी व्यक्त केली आहे. दरम्यान,  शिवाजीनगर पोलिस ठाण्यात अकस्मात मृत्यूची नोंद करण्यात आली आहे