पुणे - कोरोनाच्या (Corona) नव्या डेल्टा प्लस व्हेरिएशनचा New Delta Plus Variations) प्रसार वाढत असल्याने त्याचा फटका पुणे शहराला (Pune City) बसणार आहे. कोरोना निर्बंधाच्या दुसऱ्या स्तरात असलेल्या पुण्यात आता तिसऱ्या स्तराचे निर्बंध (Restrictions) लागू होणार आहेत. हे आदेश (Order) उद्या (शनिवारी) निघण्याची शक्यता आहे. याचा फटका बाजारपेठेसह मॉल, हॉटेल, कोचिंग क्लासेस यांना बसणार आहे. महापौर मुरलीधर मोहोळ यांनीही दुजोरा दिला. (Delta Plus Variations Blow to Pune City Possibility of Issuing New Orders)

गृहमंत्री दिलीप वळसे पाटील यांनी आज (शुक्रवारी) घेतलेल्या बैठकीत पुणे शहरात लागू असलेले दुसऱ्या स्तरातील नियम पुढच्या आठवड्यापर्यंत लागू असतील असे स्पष्ट केले होते. मात्र, ही बैठक झाल्यानंतर राज्य सरकारने नवे आदेश काढले आहेत. त्यामध्ये राज्यात तिसऱ्या पेक्षा जास्त स्तराचे निर्बंध लागू करू नयेत असे नमूद केले आहे. त्यामुळे पुण्याचा समावेश आता तिसऱ्या स्तरात होणार आहे.

महापालिकेतील अधिकाऱ्यांना याबाबत विचारले असता, राज्य सरकारकडून नवे आदेश सायंकाळी प्राप्त झाले आहेत. त्यानुसार शनिवारी नवे आदेश काढले जातील. पुण्यातील बाजारपेठ व इतर व्यवहार बऱ्यापैकी सुरू झाले होते, पण आता या आदेशामुळे निर्बंध लावले जातील, असे सांगितले.