- प्रकाश शेलार

खुटबाव - देलवडी, तालुका दौंड येथे अक्षय तृतीयानिमित्त सोंगांच्या निमित्ताने दैत्य-दानव अवतरले. गावातील १२ बलुतेदारांनी सोंगाची २०० वर्षाची परंपरा जोपासली. सोशल मीडिया व इलेक्ट्रॉनिक मीडियाच्या या जगामध्ये वर्षातून एकदा होणाऱ्या या पारंपरिक महोत्सवाला ग्रामस्थांनी भरभरून दाद दिली.

परिसरातील पारगाव, खुटबाव, राहू पिंपळगाव, वाळकी येथील ग्रामस्थांनी गर्दी केली होती. झाडूच्या सोंगाने या कार्यक्रमाची सुरुवात झाली. त्यानंतर शारजा, गणपती, दैत्य -भवानी,मणी- मल्ल अही-मही, मारुती, राम-लक्ष्मण, भैरवनाथ, जोगेश्वरी, त्राटीका, नारायण, वैदीण आदी सोंगे मुखवटे घालून नाचवण्यात आली. यावर्षी कालिका माता, खंडोबा देव ही नवीन सोंगे प्रथमच घेण्यात आली होती.

खंडोबाचे बैलगाडी मध्ये आगमन झाल्यानंतर ग्रामस्थांनी टाळ्याच्या गजरामध्ये या सोंगाला दाद दिली. रज्जाक शेख व मोहन शिर्के यांचे आवगणी गायन, नारायण भालेराव यांचे झांजवादन, हसन शेख यांचा ताशा वादनाने ग्रामस्थांचे लक्ष वेधले.

सोबत पारंपारिक वाद्यांचा निनाद व शोभेची दारू डोळ्याचे पारणे फेडले. कुंभार फळी व सुतार फळी या २ गटाच्या माध्यमातून' सरदारजीच्या करामती 'व कथा अकलेच्या कांद्याची या लघु नाटिका संपन्न झाल्या. पहाटेच्या सुमारास ग्रामस्थांच्या वतीने कलावंतांना मानाचा विडा दिला.

या कलेला दाद म्हणून शेलार पाटील परिवाराच्या वतीने अन्नदान देण्यात येते. सोंगे सुरू होण्यापूर्वी रासाई देवीची मिरवणूक निघाली. यावेळी मारुती मंदिर ते शेलारवाडा येथे अनेक युवकांनी कुलदैवत रासाई देवीला खांद्यावर घेऊन ठेका धरला.हजारो ग्रामस्थ यावेळी उपस्थित होते.

ग्रामस्थांनी अनुभवला दैत्य भवानी युद्धाचा थरार-

या सोंगामध्ये दैत्य व भवानी यांचे युद्ध हा सर्वोच्च प्रसंग ग्रामस्थांसाठी पाहण्यालायक असतो. या वर्षी यावर्षी दैत्याचे सोंग नंदू भागवत यांनी तर भवानीचे सोंग राजेंद्र बंड यांनी साकारले होते. 'भले' या आवाजाच्या जयघोष मध्ये दैत्य-भवानी एकमेकांना भिडले. हा प्रसंग प्रेक्षकांनी उभे राहून आपल्या डोळ्यामध्ये साठवला.