खेड-शिवापूर : "शासनाच्या आदेशाचे पालन करून आम्ही प्रामाणिकपणे दुकाने बंद ठेवली आहेत. मात्र दुसरीकडे दारू आणि गुटख्याची अवैध विक्री जोरात सुरू आहे. त्याकडे का दुर्लक्ष केले जात आहे?" असा सवाल खेड-शिवापूर भागातील व्यावसायिक विचारत आहेत. 

पुणे शहर आणि जिल्ह्यातील बातम्या वाचण्यासाठी येथे ► क्लिक करा

शासनाच्या आदेशानुसार अत्यावश्यक सेवा वगळता इतर व्यावसायिकांनी आपली दुकाने बंद ठेवली आहेत. मात्र त्याचवेळी दुसरीकडे खेड-शिवापूर परिसरात बंदी असूनही दारू आणि गुटख्याची जोरदार विक्री सुरू आहे. विशेषतः पुणे-सातारा रस्त्यावर वेळू आणि खेड-शिवापूर बाग परिसरातील अनेक हॉटेल आणि बारमधून मोठ्या प्रमाणात चोरून दारू विक्री होत आहे.  तसेच या भागातील अनेक पान टपऱ्यामध्ये  खुलेआम गुटखा विकला जात आहे. या पान टपऱ्यामध्ये विकण्यासाठी गुटखा येतो कोठून? असा सवाल उपस्थित होत आहे. त्यातच दुकाने बंद असल्याचा गैरफायदा घेऊन गुटखा आणि दारूची अव्वाच्या सव्वा दराने विक्री सुरू आहे.

"शासनाच्या आदेशाचे पालन करून आम्ही नुकसान होत असूनही आमची दुकाने बंद ठेवली आहेत. तर दुसरीकडे या भागात फिरताना गुटखा आणि दारूची अवैध विक्री जोरात सुरू असल्याचे दिसून येत आहे. मग नियम फक्त आम्हालाच आणि दारू आणि गुटख्याची अवैध विक्री करणाऱ्यांकडे दुर्लक्ष का?" असा सवाल या भागातील व्यावसायिक विचारत आहेत.

- दारु आणि इंग्रजी बोलण्याचा संबंध आहे का? ब्रिटनमध्ये झालं संशोधन​

याबाबत अन्न व औषध प्रशासन विभागाचे सहाय्यक आयुक्त दिलीप संगत म्हणाले, "गुटखा विक्रेत्यांवर आम्ही कारवाई करतोच. मात्र अपुऱ्या मनुष्यबळामुळे आम्हाला सगळीकडे कारवाई करणे शक्य होत नाही. अवैध गुटखा विक्रेत्यांवर कारवाईचे अधिकार पोलिसांनाही दिले आहेत. त्यामुळे अशा अवैध गुटखा विक्रेत्यांवर पोलिसही कारवाई करू शकतात."

(संपादन : सागर डी. शेलार)