देवेंद्र फडणवीस आज पुणे दौऱ्यावर आहेत. कार्यकर्ता मेळाव्यात त्यांनी उपस्थितांना संबोधित केले. यावेळी त्यांनी महाविकास आघाडीवर हल्लाबोल केला. शिल्लकसेना म्हणत त्यांनी उद्धव ठाकरे यांच्यावर देखील टीका केली. उद्धव ठाकरे गटाने केलेल्या मागण्या सर्वोच्च न्यायालयाने मान्य केल्या नाहीत, त्यामुळे हे सरकार संविधानिक आहे, असे फडणवीस म्हणाले.

देवेंद्र फडणवीस म्हणाले, महाराष्ट्रात पुन्हा भाजपचे सरकार येणार आहे. कर्नाटकमधील भाजपच्या पराजयाची चर्चा होत आहे. मात्र ज्यांची एक जागा निवडून आली नाही. ते बडवत आहेत, ज्यांच्या घरी पोरगा झाला नाही ते देखील आनंद साजरा करत आहेत. 

मात्र राज्यात पुन्हा आपली सत्ता येणार आहे. महाराष्ट्रात कर्नाटक पॅटर्न लागू करणार असे काहीजण सांगत आहेत. मात्र अल्पसंख्यांकांचे ध्रुवीकरण करुन महाराष्ट्रात जिंकता येणार नाही, असे फडणवीस म्हणाले.

महाराष्ट्रात एकच पॅटर्न चालेल मोदी पॅटर्न आणि भाजप पॅटर्न, असे फडणवीस म्हणाले. भाजप आणि शिवसेनेची युती भक्कम आहे. आपला निवडून येण्याचा फॉर्म्युला मोदीजींची कार्यशैली, सामान्यांच्या विकासाचा आपला नरेटीव्ह आहे, असे फडणवीस म्हणाले.