विश्रांतवाडी - धानोरी येथील परांडेनगर येथे आज सकाळी ९ वाजताच्या सुमारास गॅस सिलेंडरचा स्फोट झाला आहे. परांडेनगर सर्व्हे न.८१/८२ लक्ष्मीनगर सोसायटी समोरच्या खोलीत हा स्फोट झालेला.स्फोटावेळी घरातील कामानिमित्त बाहेर असल्याने जीवितहानी झाली नाही.

परंतु घरातील सर्व घरगुती सामान जळून खाक झाले. नुकसानग्रस्त घरमालक विजय कणीराम राठोड हे अपंग असून गॅस सिलेंडर स्फोटामुळे त्यांच्या संसार उघड्यावर पडला आहे. शेजारी असलेल्या खोलीमध्ये महादेव नवनाथ खिलारे यांच्यासुद्धा मोठ्या प्रमाणात नुकसान झाले आहे.

घटनास्थळी अग्निशमन दलाची गाडी वेळेवर पोहचल्यामुळे शेजारी असलेल्या इतर घरांची आगीपासून हानी झाली नाही. दुर्घटनास्थळी धानोरीतील सामाजिक कार्यकर्ते दिलीप डाळीमकर, दत्तात्रय परांडे, वाल्मिक कानसकर, शहाजी खलसे, नवनाथ कानसकर गेले असता पीडित अपंग व्यक्ती विजय राठोड यांना रडू कोसळले.

गॅस सिलेंडर स्फोटामुळे संसार जळालेल्या कुटुंबाला मदतीचे आवाहन यानिमित्ताने करण्यात येत आहे.तरी ज्याला ज्याला जी शक्य मदत असेल त्याने ती मदत देऊन पीडित कुटुंबाचा संसार पुन्हा उभारण्यास मदत करावी.