माले (पुणे) : मुळशी धरण परिसरात सुरू असलेल्या जोरदार पावसामुळे धरणाच्या पाणीसाठ्यात वेगाने वाढ होत असून, शुक्रवारी (ता. 2) सकाळी धरण 93 टक्‍क्‍यांवर (16.98 टीएमसी) पोचले. पावसाचा जोर सुरूच असल्याने धरणातील पाण्यावर नियंत्रण ठेवण्यासाठी दुपारी साडेबारा वाजता धरणाचे दोन दरवाजे उघडून एक हजार क्‍युसेकने पाणी मुळा नदीत सोडण्यात आले. सायंकाळी त्यात वाढ करून पाच दरवाजांतून 3500 क्‍युसेकने विसर्ग सोडण्यात आला. 

मुळशी तालुक्‍याच्या पश्‍चिम पट्ट्यातील निळा व मुळा नद्यांच्या खोऱ्यात जोरदार पाऊस सुरू आहे. याच पट्ट्यातील ताम्हिणी, शिरगाव परिसरात आतापर्यंत एकूण 4500 मिलिमीटरपेक्षाही जास्त पाऊस झाला आहे. तसेच, शिरगाव व आंबवणे येथे एकूण चार हजार मिलिमीटरपेक्षाही जास्त पाऊस झाला आहे. या खोऱ्यातील एकूण 18.43 टीएमसी क्षमता असलेल्या मुळशी धरणात सध्या जोरदार पावसामुळे मोठ्या प्रमाणात पाणी येत आहे. त्यामुळे आज दुपारी साडेबारा वाजता धरणाच्या सात स्वयंचलित दरवाजांपैकी दोन दरवाजे उघडून एक हजार क्‍युसेकने विसर्ग मुळा नदीत सोडण्यात आला. त्यानंतरही मुसळधार पाऊस सुरू असल्याने पाणीही वाढतच असल्याने सायंकाळी सहा वाजता विसर्ग वाढवून पाच दरवाजांतून 3500 क्‍युसेक करण्यात आला. 

दरम्यान, टाटा पॉवर कंपनी व प्रशासनाच्या वतीने मुळा नदीकाठच्या गावांना सतर्कतेचा इशारा देण्यात आला. पावसाचा जोर पाहून विसर्ग आणखी जास्त किंवा कमी करण्यात येणार आहे. 

मुळशी धरण परिसरात गेल्या चोवीस तासांत नोंदण्यात आलेला पाऊस व कंसात एकूण पाऊस मिलिमीटरमध्ये पुढीलप्रमाणे : मुळशी कॅम्प- 92 (2171), दावडी- 184 (4058), ताम्हिणी- 190(4565), शिरगाव- 220(4539), आंबवणे- 137 (4193).