पिंपरी - कोरोनाबाधित व संशयितांवर महापालिकेच्या वायसीएम व भोसरी रुग्णालयात उपचार सुरू आहेत. संशयितांच्या घशातील द्रवांचे नमुने आठ खासगी रुग्णालयांमार्फतही संकलित केले जात आहेत. त्यामुळे अशा रुग्णालयांमध्ये निर्माण होणाऱ्या जैववैद्यकीय कच-याची विल्हेवाट लावणे आव्हानात्मक आहे. मात्र, हे आव्हान पास्को एन्व्हायरमेंट सोल्यूशन प्रायव्हेट लिमिटेड कंपनीच्या शिलेदारांनी लिलया पेलले आहे. 

बातम्या ऐकण्यासाठी डाऊनलोड करा ई-सकाळचे ऍप

पास्को ही पुणे व पिंपरी-चिंचवड महापालिका क्षेत्रातील जैव वैद्यकीय कच-यावर प्रक्रिया करणारी खासगी कंपनी असून ती देशातील सर्वांत जुनी आहे. पिंपरी-चिंचवड शहरात १९९६-९७ पासून ती कार्यरत आहे. कंपनीला पर्यावरण संवर्धनासाठी वसुंधरा पुरस्कार प्राप्त आहे. कोरोनाचा प्रादुर्भाव वाढू नये व देश साथमुक्त व्हावा, यासाठी केंद्रीय व राज्य प्रदूषण नियंत्रण मंडळाने वैद्यकीय आणि आरोग्य विभागांना केलेल्या सूचनांनुसार काम सुरू आहे. त्यावर महापालिका आरोग्य वैद्यकीय विभागाचे नियंत्रण आहे. 

पुण्याच्या आणखी बातम्या वाचण्यासाठी येथे ► क्लिक करा

रंगावरून ओळखतात जैववैद्यकीय कचरा 
क्वारंटाइन व आयसोलेशन कक्ष, कोरोनाबाधित रुग्णांच्या उपचारादरम्यान निर्माण होणारा जैववैद्यकीय कचरा संकलन, वाहतूक व विल्हेवाट लावताना लाल, पिवळ्या, निळ्या व पांढ-या अशा चार रंगांचा वापर केला जात आहे. 
- लाल : पुनर्वापर कचरा 
- पिवळा : अवयव व त्या संबंधित कचरा 
- निळा : काच, धातू आदी 
- पांढरा : तीक्ष्ण व संसर्गजन्य 

असे चालते काम 
- डॉक्टर, नर्स, आरोग्य कर्मचारी, प्रयोगशाळा कर्मचारी, क्वारंटाइन, आयसोलेशन कक्षात वापरलेले मास्क, हातमोजे आणि इतर संरक्षक उपकरणे यांचे स्वतंत्रपणे संकलन केले जाते. 
- हा कचरा सामान्य प्रक्रिया सुविधा ऑपरेटर ताब्यात घेतात. रंगानुसार वर्गवारी केलेल्या पिशव्यांना बारकोड दिला जातो. पिशवीवर रुग्णालयाचे नाव, पिशवी क्रमांक, तिचा रंग, आकार नमूद केली जाते. कचरा गोळा करताना बारकोड स्कॅनर व जोडलेल्या वजन यंत्रामुळे पिशवीवरील बारकोडबरोबरच वजन, तारीख व वेळही नोंदवली जाते. 
- हा कचरा वाहतूक वाहन प्रक्रिया केंद्रात आल्यानंतर तपासणी केली जाते. रंगांनुसार पिशव्यांचे वर्गीकरण केले जाते. त्यानुसार कचरा नष्ट केला जातो. 
- कचरा वाहतूक करणाऱ्या वाहनांचे प्रत्येक खेपेनंतर निर्जंतुकीकरण केले जाते. 
- कामगार, कर्मचाऱ्यांना पर्सनल प्रोटेक्टिव्ह इक्विपमेंट, संरक्षणात्मक साधने पुरवली जातात ज्याचा खर्च दररोज दरडोई अंदाजे एक हजार रुपये येतो. ओळखपत्र व मास्क सक्तीचे आहे. दरमहा प्रशिक्षण दिले जाते. साप्ताहिक आरोग्य तपासणी केली जाते. 
- प्रदुषण नियंत्रण मंडळाला वेळोवेळी माहिती दिली जाते. 
- कोरोनाच्या पार्श्र्वभूमीवर स्वतंत्र वाहन ठेवले आहे. कोरोनाचा कचरा असलेल्या पिशव्यांवर 'कोरोना वेस्ट' असे नमूद केले जाते. कर्मचारी व कामगारांना सॅनिटायझर व साबण उपलब्ध करून दिले आहेत. 

खासगी व सरकारी रुग्णालयांतील रोजचा जैववैद्यकीय कचरा संकलन, वाहतूक व प्रक्रिया करण्याचे काम युद्ध पातळीवर सुरू आहे. कोरोनाच्या पार्श्र्वभूमीवर अधिक दक्षता घेतली जात आहे. मात्र, हे काम करणारे कामगार, कर्मचारी यांना प्रधानमंत्री गरीब कल्याण योजनेतून विमा संरक्षण मिळावे. 
- प्रदीप मुळ्ये, संचालक, पास्को एन्व्हायरमेंट सोल्यूशन लिमिटेड 

दृष्टिक्षेपात 
- प्रक्रिया केंद्र : वायसीएम आवार 
- वाहने : पाच मोठी, दोन दुचाकी 
- कचरा संकलन (१४/४) : ७५० किलो 
- कोवीड कचरा संकलन (१४/४) : ४४ किलो