दौंड : ‘‘महाराष्ट्र पोलिस दलात दाखल झालेल्या नवप्रविष्ठांनी कर्तव्याचे सचोटीने पालन करून आदरयुक्त भीती निर्माण करावी. निर्दोष व्यक्तीला शिक्षा होणार नाही आणि दोषी सुटणार नाही, याबाबत नेहमी दक्ष राहावे,’’ असे आवाहन पिंपरी चिंचवडचे पोलिस आयुक्त कृष्ण प्रकाश यांनी केले.नानवीज (ता. दौंड) येथील पोलिस प्रशिक्षण विद्यालयात गुरुवारी ४१व्या प्रशिक्षण सत्राच्या दीक्षान्त संचलनाचे प्रमुख पाहुणे म्हणून मानवंदना स्वीकारल्यानंतर कृष्ण प्रकाश यांनी हे आवाहन केले. विद्यालयाचे प्राचार्य संदीप आटोळे यांनी प्रास्ताविक करून नवप्रविष्ठांना कर्तव्याची शपथ दिली. समादेशक तानाजी चिखले या वेळी उपस्थित होते.

कृष्ण प्रकाश म्हणाले, ‘‘खाकी गणवेश आपण स्वेच्छेने निवडलेला आहे, हे नवप्रविष्ठांनी सदैव लक्षात ठेवून जनतेची सेवा करावी. गणवेश हा राष्ट्रसेवा आणि रक्षणासाठी आहे, कोणताही स्वार्थ साधण्यासाठी नाही. प्रत्येक दिवस संघर्षाचा आहे, पण प्रामाणिकपणे कर्तव्य पार पाडले, तर त्याचे समाधान देखील आहे. कर्तव्य बजावताना मनुष्य जीवन सुंदर करण्याकरिता सतत प्रयत्न करावे.’’जळगाव पोलिस दलाचे सौरभ कोलले यांनी या दिमाखदार संचलनाचे नेतृत्व केले. पोलिस निरीक्षक एस. बी. काळे व हवालदार दत्तात्रेय निकम यांनी सूत्रसंचालन केले. उपप्राचार्य एच. पी. मुलाणी यांनी आभार मानले.

बीडचा विशाल जगताप अष्टपैलू

पोलिस आयुक्त कृष्ण प्रकाश यांच्या हस्ते विशाल जगताप (बीड), श्‍याम माने (नांदेड) व सुनील निकम (सातारा) यांचा गुणानुक्रमे पहिले तीन अष्टपैलू प्रशिक्षणार्थी म्हणून गौरव केला. त्याचबरोबर अकाश बिराजदार (लातूर), महादेव गोयकर (जळगाव), सौरभ कोलले (जळगाव), सुनील चौधरी (गोंदिया) व संदेश बैसाणे ( धुळे) यांना विविध गटांमधील कामगिरीसाठी प्रशस्तिपत्र व सन्मानचिन्ह प्रदान करून गौरविण्यात आले.