पुणे : सावित्रीबाई फुले पुणे विद्यापीठाच्या शैक्षणिक बहुमाध्यम संशोधन केंद्राने (इएमएमआरसी) तयार केलेल्या “देवराई: पर्यावरणाचा सांस्कृतिक वारसा” या डॉक्युमेन्ट्रीला 'कॉमनवेल्थ एज्युकेशनल मिडिया सेंटर फॉर एशिया' या संस्थेने घेतलेल्या आंतरराष्ट्रीय एशियन स्पर्धेमध्ये एज्युकेशनल टिव्ही प्रोग्राम आणि डॉक्युमेन्ट्री विभागात पहिले पारितोषिक मिळाले.

एज्युकेशनल मिडिया फेस्टिव्हल फॉर कॉमनवेल्थ अशिया हा महोत्सव 8 आणि ९ जानेवारी २०१९ ला दिल्ली येथे पार पडला. ही स्पर्धा एकूण तीन विभागाअंतर्गत घेण्यात आली होती. विद्यापीठाच्या इएमएमआरसी विभागाने “देवराई” या विषयावर डॉक्युमेन्ट्री तयार केली आहे. यामध्ये पुणे परिसर आणि कोकणामधील देवरायांचा अभ्यास करून तिथे चित्रिकरण केले आहे.

शासकीय पातळीवर तसेच सेवाभावी संस्था (एनजीओ) आणि स्थानिक लोकांनी पुढाकार घेऊन पर्यावरण संवर्धनासाठी नवीन वनरायांची निर्मिती करून त्याचं संवर्धन करावे या हेतूने या डॉक्युमेन्ट्रीची निर्मिती केली आहे.
  
इएमएमआरसी विभागाकडून देवराई या डॉक्युमेन्ट्रीसाठी लेखन आणि दिग्दर्शन मिलिंद पाटील यांनी केले आहे. तर निर्माता म्हणून विवेक नाबर यांनी काम पहिले आहे. त्यासाठी अधिष्ठाता आणि इएमएमआरसी च विभागप्रमुख डॉ. अरविंद शाळीग्राम यांचे मार्गदर्शन लाभले. कॅमेऱ्याची जबाबदारी इरफान कार्नाळकर आणि वसिम पठाण यांनी घेतली होती. ग्राफिक्स साठी विनोद काळगी आणि अमृता घोडे तर ध्वनी राम जाधव, आणि सहाय्यक म्हणून सिलास काकडे आणि सिल्वराज पिल्ले यांनी काम पहिले. या डॉक्युमेन्ट्री साठी महाराष्ट्र वृक्ष संवर्धनी, देवराई अभ्यासक डॉ. उमेश मुंडले, दिलीप कुलकर्णी आणि यांचेही योगदान लाभले, अशी माहिती डॉ. अरविंद शाळीग्राम यांनी दिली.