दानपेटी फोडणारा चार तासांत जेरबंद
राहुरी, ता. १५ : म्हैसगाव येथे श्री क्षेत्र केदारेश्वर देवस्थानातील दानपेटी फोडून रोख रक्कम चोरणाऱ्या एका आरोपीस राहुरी पोलिसांनी अवघ्या चार तासांत अटक केली. दीपक राधू आंबेकर (वय २८, रा. कोळेवाडी, ता. राहुरी) असे अटक करण्यात आलेल्या आरोपीचे नाव आहे. त्याने पोलिसांच्या प्राथमिक चौकशीत गुन्ह्याची कबुली दिल्याचे पोलिस निरीक्षक संजय ठेंगे यांनी सांगितले. म्हैसगाव येथे श्री क्षेत्र केदारेश्वर देवस्थानात गुरुवारी (ता. १४) रात्री अज्ञात चोरट्याने प्रवेश करून दानपेटी फोडली. त्यातील रोख रक्कम चोरून नेली. हा प्रकार आज शुक्रवारी (ता. १५) सकाळी उघडकीस आला. याप्रकरणी राहुरी पोलिस ठाण्यात गुन्हा दाखल करण्यात आला. गुन्ह्याचा तपास सुरू असताना पोलिस निरीक्षक संजय ठेंगे यांना मिळालेल्या गोपनीय माहितीच्या आधारे रामनाथ सानप, राजू पुंड, गणेश मैड यांच्या पथकाने शोध मोहीम राबवून आरोपीला ताब्यात घेतले.