पुणे : देशातील शैक्षणिक संस्थाचा दर्जा निश्चित करून त्यांना मानांकन देणाऱ्या राष्ट्रीय मूल्यांकन आणि मानांकन परिषदेच्या (नॅक) कार्यकारी समितीचे अध्यक्ष डॉ. भूषण पटवर्धन यांनी राजीनामा देण्याची तयारी केली आहे.

डॉ. पटवर्धन यांनी वर्षभरापूर्वीच हा कार्यभार स्वीकारला होता. तेथील कामकाज समजून घेत असताना तेथील कारभारामधील अनागोंदी, गैरप्रकार लक्षात आल्यानंतर त्यांनी 'नॅक' समितीच्या राष्ट्रीय स्तरावरील चौकशीची मागणी केली होती.

तसेच 'नॅक'च्या कामकाजामध्ये पारदर्शकता आणण्यासाठी त्यांनी विशेष प्रयत्न केले. 'नॅक'च्या कारभाराबाबत असंख्य तक्रारींचा आढावा घेतल्यानंतर कारभार सुधारण्यासाठी त्यांनी पाऊले उचलली. परंतु त्याकडे 'नॅक'मधील यंत्रणांकडून दुर्लक्ष करण्यात आले होते.

'नॅक'मधील या गैरप्रकारांबद्दल त्यांनी विद्यापीठ अनुदान आयोगाच्या अध्यक्षांना पत्र पाठवले. त्यात सर्व प्रकारांचा उल्लेख त्यांनी केला आणि राजीनामा देण्यासंबंधी विनंती केली. आयोगाने त्यांची ही विनंती मान्य केली असून, डॉ. भूषण पटवर्धन यांनी आता नॅक अध्यक्षपदाचा राजीनामा देण्याची तयारी केली आहे. डॉ. पटवर्धन यांच्याशी 'सकाळ'ने संपर्क साधला असता, त्यांनी आयोगाला सविस्तर पत्र पाठविल्याचे सांगितले. मात्र, आतातरी या विषयावर काही बोलणार नसल्याचे त्यांनी स्पष्ट केले.