पुणे - इतिहास हीच आंतरविद्याशाखीय ज्ञानशाखा आहे. इतिहासाचा बहुआयामी अभ्यास गरजेचा आहे. एखाद्या घटनेमागची राजकीय, सामाजिक, आर्थिक, सांस्कृतिक पार्श्‍वभूमी तसेच मानसशास्त्र, भूगोल समजावून घेणे गरजेचे असल्याचे मत ज्येष्ठ साहित्यिक डॉ. सदानंद मोरे यांनी व्यक्त केले.

ताज्या बातम्यांसाठी डाऊनलोड करा ई-सकाळचे ऍप

सर परशुराम भाऊ महाविद्यालयाच्या इतिहास विभागाचे प्राध्यापक सोपान शेंडे लिखित ‘महाराष्ट्राचा समग्र इतिहास खंड-१’ या पुस्तकाचे प्रकाशन डॉ. मोरे यांच्या हस्ते झाले. या वेळी ते बोलत होते. महाविद्यालयाचे प्राचार्य दिलीप शेठ, पुणे विद्यापीठाच्या इतिहास विभागाच्या प्रमुख श्रद्धा कुंभोजकर, मोहिनी कारंडे, डॉ. कीर्ती मुळीक उपस्थित होते.

आणखी वाचा - रामाची अयोध्या, घटनापीठाचा एकमुखी निर्णय

डॉ. मोरे म्हणाले, ‘‘इतिहासाचा अभ्यास करत असताना भूतकाळातील घटनांचा अभ्यास करावा लागतो. ते इतिहास अभ्यासकांच्या दृष्टीने अवघड काम असते. या पुस्तकाला अनेक कालखंडाचा स्पर्श झालेला आहे. छत्रपती शिवाजी महाराजांचा इतिहास तर या पुस्तकात आहेच. शिवाय महाराष्ट्राच्या सामाजिक बाबींचा समावेशदेखील असल्याचे दिसून येते.’’ 

या वेळी डॉ. मोरे यांनी पुस्तकातील पुतळे आणि शिल्पकार यांचा संदर्भ देत राज्यातील पुतळ्यांचे राजकारण तसेच तत्कालीन परिस्थितीतील वेगवेगळ्या वादासंदर्भात माहिती 
दिली. 

वर्तमानासाठी नेहमी इतिहासाचा अभ्यास व त्याची माहिती समजून घेणे आवश्‍यक असते. त्यामुळे इतिहास हा वेगवेगळ्या प्रकारचा असून त्या विविधतेचा अभ्यास महत्त्वाचा ठरतो, असेही त्यांनी सांगितले. प्राचार्य डॉ. शेठ यांचे भाषण झाले. राहुल मेश्राम यांनी सूत्रसंचालन केले.