आळेफाटा, ता. २३ : मद्याच्या नशेत पोलिसांच्या ‘डायल ११२’ हेल्पलाइनवर मारहाणीचा खोटा बनाव रचून शासकीय यंत्रणेची दिशाभूल करणाऱ्या तरुणाला आळेफाटा पोलिसांनी अटक केली. हर्षल प्रकाश पाटील (वय ३५, रा. चहार्डी, जि. जळगाव) असे अटक केलेल्याचे नाव आहे.
मिळालेल्या माहितीनुसार, शनिवारी (ता. २०) पहाटे हर्षलने पोलिसांना दूरध्वनी करून खासगी बसचालकाकडून मारहाण होत असल्याची तक्रार केली. मदतीसाठी गस्ती पथक तातडीने घटनास्थळी पोहोचले, मात्र तिथे कोणीही आढळले नाही. त्यानंतर त्याने पुन्हा दूरध्वनी करून पोलिसांना चुकीची माहिती दिली. संशय आल्याने पोलिसांनी त्याला आळेफाटा बसस्थानकाजवळ गाठले. तिथे त्याने पोलिसांशी हुज्जत घालत रस्त्यावर गोंधळ घातला. त्यानंतर पोलिसांनी त्याला थेट आळे येथील प्राथमिक आरोग्य केंद्रात नेऊन डॉक्टरांसमोर उभे केले. वैद्यकीय तपासणीत त्याने मद्याचे अतिसेवन केल्याचे प्रमाणपत्र डॉक्टरांनी पोलिसांच्या हाती दिले. दारू पिऊन विनाक्रमांक वाहन चालवणे आणि पोलिसांना खोटी माहिती देऊन शासकीय यंत्रणेची दिशाभूल केल्याप्रकरणी त्याच्यावर गुन्हा दाखल करण्यात आला आहे. पोलिस निरीक्षक विश्‍वास जाधव यांच्या मार्गदर्शनाखाली हवालदार पोपट कोकाटे पुढील तपास करत आहेत.