पिंपरी - देशी कांद्याच्या भावाने उच्चांक गाठल्याने पिंपरीतील लालबहादूर शास्त्री भाजी मंडईत इजिप्तचा लाल कांदा दाखल झाला आहे. यापूर्वी तुर्कस्तानचा कांदा भाजी मंडईत आला होता. मात्र, सध्या तुर्कस्तानचा कांदा मंडईत कमी प्रमाणात शिल्लक राहिला आहे, त्यामुळे इजिप्तच्या कांद्याला मागणी वाढेल, अशी अपेक्षा कांदा विक्रेत्यांनी व्यक्त केली.

ताज्या बातम्यांसाठी डाऊनलोड करा ई-सकाळचे ऍप

इजिप्तचा कांदा पुण्यातील गुलटेकडी मार्केट येथून गुरुवारी (ता. ५) पिंपरीत दाखल झाला. सध्या किरकोळ विक्रेत्यांनी एक टनापर्यंत कांदा मागविला आहे. त्याची विक्री सध्या १२० रुपये प्रतिकिलोप्रमाणे होत असून, हा कांदा थंड व लाल रंगाचा आहे. कांदा सडू नये, यासाठी एसी गाडीमधून त्याची आयात करण्यात आली आहे. यासाठी ८ टक्के अडत घेतली जात आहे. 

देशी कांद्याचे भाव दीडशे रुपयांच्यावर गेले आहेत, त्यामुळे गृहिणींनीही जेवणातून कांदा कमी केला आहे, तर खाणावळीतूनही कांदा गायब झाला आहे. देशी कांद्यापेक्षा इजिप्तचा कांदा तीस ते चाळीस रुपयांनी स्वस्त असल्याने महिला खरेदी करण्यास प्राधान्य देत आहेत.