सकाळ न्यूज नेटवर्क
नवी दिल्ली, ता. २ : इलेक्ट्रॉनिक उपकरणे निर्मिती योजनेतंर्गत (ईसीएमएस) २२ प्रस्तावांना केंद्र सरकारने मंजुरी दिली आहे. सर्व प्रस्ताव मार्गी लागले तर ४१ हजार ८६३ कोटी रुपयांची गुंतवणूक होण्याचा अंदाज असून याद्वारे दोन लाख ५८ हजार १५२ कोटी रुपयांच्या इलेक्ट्रॉनिक वस्तूंचे उत्पादन होईल. ज्या कंपन्यांच्या प्रस्तावांना मंजुरी मिळाली आहे, त्यात डिक्सोन, सॅमसंग डिस्प्ले नोएडा प्रा. लि., फॉक्सकॉन (युहझॉन टेक्नॉलॉजी इंडिया) आणि हिंदाल्को इंडस्ट्रीज यांचा समावेश आहे.
नव्याने मंजूर झालेल्या ‘ईसीएमएस’ प्रस्तावामुळे ३३ हजार ७९१ लोकांना थेट रोजगार प्राप्त होण्याचा अंदाज आहे. इलेक्ट्रॉनिक्स आणि आयटी मंत्रालयाने यापूर्वी १२ हजार ७०४ कोटी रुपये गुंतवणुकीच्या २४ प्रस्तावांना मंजुरी दिली होती. त्यापाठोपाठ आता २२ प्रमुख प्रस्तावांना मंजुरी देण्यात आली आहे. प्रस्तावांच्या मंजुरीचे पत्र केंद्रीय मंत्री अश्विनी वैष्णव यांनी शुक्रवारी संबंधित कंपन्यांना दिले. मोबाईल इंजिनिअरींग, दूरसंचार, कंझ्युमर इलेक्ट्रॉनिक्स, स्ट्रॅटेजिक इलेक्ट्रॉनिक्स, ऑटोमोटिव्ह आणि आयटी हार्डवेअर अशा क्षेत्रामध्ये संबंधित कंपन्या गुंतवणूक करणार आहेत.
ज्या आठ राज्यांमध्ये कंपन्यांकडून प्रकल्प स्थापन केले जाणार आहेत, त्यात महाराष्ट्र, मध्य प्रदेश, आंध्र प्रदेश, हरियाना, कर्नाटक, तमिळनाडू, उत्तर प्रदेश आणि राजस्थान यांचा समावेश असून सुट्या उपकरणांमध्ये पीसीबी, कॅपॅसिटर्स, कनेक्टर्स, इन्क्लोजर्स, लायोन सेल्स, कॅमेरा मोड्यूल्स, डिस्प्ले मोड्यूल्स, ऑप्टिकल ट्रान्सरिसिव्हर्स, ॲल्युमिनियम एक्स्ट्रूजन, ॲनोड मटेरियल आणि लॅमिनेट यांचे उत्पादन केले जाणार आहे.