पुणे ः पोलिसात नोकरीला असल्याची बतावणी करीत एका महिलेला तिच्या मुलास पोलिसात नोकरी लावून देतो, असे सांगून ठगाने महिलेची 67 हजार रुपयांची फसवणूक केली. याप्रकरणी समर्थ पोलिसांनी तोतया पोलिसास अटक केली. 

पुण्याच्या बातम्या वाचण्यासाठी येथे ► क्लिक करा

सुरेश ईश्वर पेडणेकर (वय 36, रा. भांडूप, मुंबई) असे अटक केलेल्या संशयित आरोपीचे नाव आहे. याप्रकरणी मंगळवार पेठेतील 42 वर्षीय महिलेने समर्थ पोलिस ठाण्यात फिर्याद दिली होती. पोलिसांनी दिलेल्या माहितीनुसार, फिर्यादी महिला व आरोपी पेडणेकर यांची एका मध्यस्थामार्फत दीड वर्षांपुर्वी ओळख झाली होती. त्यावेळी पेडणेकरने फिर्यादी महिलेस तो पोलिस असल्याची बतावणी केली होती. दरम्यान, फिर्यादी यांचा मुलागा शिकलेला असूनही त्यास नोकरी नव्हती. त्यावेळी फिर्यादीच्या मुलाला आपल्या ओळखीने पोलिसात नोकरी मिळवून देतो, असे पेडणेकरने फिर्यादीस सांगितले. फिर्यादी महिलेनेही त्याच्यावर विश्‍वास ठेवला. 

पीएमपीला दिवसभरात मिळाले साडेचार लाखांचे उत्पन्न

दरम्यान, मुलाला पोलिस खात्यात नोकरी लावण्यासाठी पेडणेकरने फिर्यादीकडे 80 हजार रुपयांची मागणी केली. फिर्यादीनेही मुलाला नोकरी लागेल, या आशेने पेडणेकर यास 80 हजार रुपये दिले. पैसे देऊन अनेक दिवस उलटले तरीही मुलाला पोलिसात नोकरी लागली नाही. त्यामुळे फिर्यादीने आरोपीकडे त्याबाबत चर्चा केली. त्यानंतर आरोपीने त्यांच्या बॅंकेच्या खात्यावर 12 हजार रुपये जमा केले.

हेही वाचा : पुणे शहरात कर्फ्यूचं स्वरुप कसं असणार? महापालिकेनं दिली माहिती

त्यानंतर उर्वरीत रक्कम देण्यासाठी फिर्यादीने त्याच्याकडे तगादा लावला. तरीही त्याने फिर्यादीस पैसे देण्यास टाळाटाळ केली. आपली फसवणूक झाल्याचे लक्षात येताच, फिर्यादीने समर्थ पोलिस ठाण्यात जाऊन पेडणेकरविरुद्ध फिर्याद दाखल केली. पोलिसांनी या प्रकरणाचा तपास करून आरोपीस अटक केली. दरम्यान, आरोपीने या पद्धतीने आणखी किती जणांना नोकरी लावण्याचे आमिष दाखवून त्यांची फसवणुक केली आहे, याचा तपास पोलिस उपनिरीक्षक एस.बी.जोरे करीत आहेत

(संपादन : सागर डी. शेलार)