खरिपातील चार लाख ७९ हजार शेतकऱ्यांना पीकविम्याचे कवच दुष्काळी स्थितीत ठरणार आधार; ४ लाख ७ हजार २३० हेक्टर संरक्षित सकाळ वृत्तसेवा धाराशिव, ता. २१ ः खरीप हंगामात जिल्ह्यातील ४ लाख ७९ हजार ३६६ शेतकऱ्यांनी विमा संरक्षणात सहभाग नोंदवला असून, याद्वारे ४ लाख ७ हजार हेक्टरहून अधिक क्षेत्र २ हजार ५०७ कोटी रुपयांच्या संरक्षित कवचाखाली आले आहे. निसर्गाच्या लहरीपणाशी सामना करावा लागल्याने यंदा खरिपातील पिकांना पीकविमा भरपाई मिळण्याची चिन्हे असून, जिल्ह्यातील दुष्काळी स्थितीत शेतकऱ्यांना पीकविमा कवच आर्थिक आधार देणारे ठरणार आहे. जिल्ह्यातून एकूण ४ लाख ७९ हजार ३६६ अर्ज प्राप्त झाले असून, याद्वारे ४ लाख ७ हजार २३०.५० हेक्टर क्षेत्र संरक्षित झाले आहे. यासाठी एकूण २ हजार ५०७ कोटी ४० लाख रुपये इतकी विमा संरक्षित रक्कम ठरवण्यात आली आहे. यामध्ये शेतकरी, राज्य शासन आणि केंद्र शासन यांच्या सहभागातून एकूण १७२ कोटी ४६ लाख रुपयांचा विमा हप्ता निश्चित झाला आहे. नोंदविलेली विमा संरक्षित रक्कम ही पिकांना मिळालेले एकूण संरक्षण आहे. प्रत्यक्ष नुकसानभरपाईची रक्कम ही योजनेतील तरतुदी, पात्रता निकष आणि नुकसानाच्या मूल्यांकनानुसार निश्चित केली जाते. त्यामुळे शेतकऱ्यांना संरक्षित रकमेपैकी नेमकी किती टक्के विमा भरपाई मिळणार, हे मात्र अद्याप निश्चित झालेले नाही. .................... ((चौकट)) सोयाबीनचा सर्वाधिक वाटा पीकनिहाय आकडेवारीनुसार जिल्ह्यात सोयाबीन पिकाला सर्वाधिक पसंती मिळाली असून, सोयाबीनसाठी मोठा विमा हप्ता नोंदवला गेला आहे. सोयाबीनपाठोपाठ तूर, उडीद, मका, मूग, कांदा, कापूस आणि बाजरी या पिकांसाठीही हजारो शेतकऱ्यांनी अर्ज करून आपल्या पिकांना सुरक्षा कवच मिळवून दिले आहे. ................. ((चौकट)) तालुकानिहाय स्थिती तालुका...अर्ज...क्षेत्र (हे.)...संरक्षित रक्कम तुळजापूर...८६,६७०...९४,७४९.१०...५८८ कोटी ३४ लाख रुपये धाराशिव...८६,१३१...८२,८६१.०६...५१६ कोटी १७ लाख रुपये कळंब...७६८७२...५६,४८४.९७...३५२ कोटी ३० लाख रुपये उमरगा...६५३८७...६०,८३४.५५...३७२ कोटी ७६ लाख रुपये भूम...६२३२३...४०८८४.३९...२४९ कोटी ८० लाख रुपये वाशी...४२३६७...२६,५९२.७२...१६४ कोटी ६२ लाख रुपये लोहारा...३१५८१...३०१८२.६९...१८५ कोटी ७६ लाख रुपये परंडा...२८०३५...१४६४०.९८...७७ कोटी ६७ लाख रुपये